Aqmola oblysynda Astrahan aýdandyq máslihaty tóraǵasynyń úiine qaraqshylyq shabýyl jasaǵan úsh retsidivistke qatysty úkim shyqty, dep habarlaidy Dala News.
Aiyptalýshylar qatarynda Taraz ben Shymkent qalalarynyń turǵyndary bar. Olar iri kólemde tonaý, turǵyn úige zańsyz kirý jáne aldyn ala sóz bailasqan adamdar toby retinde kólikti aidap ketý baptary boiynsha kináli dep tanyldy.
Sot anyqtaǵandai, 2025 jyldyń shildesinde úsh er adam ádeii Astrahanka aýylyna kelgen. Túnde betterin maskamen jaýyp, quramynda hlory bar gaz ballonyn alyp, úige basyp kirgen. Sol sátte úide tórt eresek adam men úsh jasar bala bolǵan.
Qaraqshylar aqsha men baǵaly zattardy talap etken. Qolma-qol qarjy men zergerlik buiymdardy iemdengen soń, otbasy múshelerin jertólege qamap, úi iesiniń kóligimen oqiǵa ornynan qashyp ketken. Keltirilgen materialdyq shyǵyn kólemi 4,2 mln teńgeni qurady.
Sot eki aiyptalýshyǵa buryn ótelmegen jazalaryn eskere otyryp, eń joǵary qaýipsizdik mekemesinde óteitin 8 jyl 6 ai bas bostandyǵynan aiyrý jazasyn taǵaiyndady. Úshinshi qatysýshy 5 jylǵa ortasha qaýipsizdik mekemesine jiberildi.
Sonymen qatar sot olardan birlesip materialdyq shyǵyndy jáne moraldyq ótemaqyny óndirip alý týraly sheshim shyǵardy. Eki jábirlenýshiniń árqaisysyna 2 mln teńgeden tóleý mindetteldi.
Jeke qaýlylar arqyly sot Jambyl jáne Túrkistan oblystarynyń politsiia departamentterine shartty túrde merziminen buryn bosatylǵan tulǵalarǵa baqylaýdy kúsheitý qajettigin kórsetti.
Úkimder ázirge zańdy kúshine engen joq.
