UQK-niń eks-tóraǵasy Kárim Másimovtiń burynǵy orynbasary Marat Osipov temir tordan bosatyldy, dep habarlaidy Dalanews.kz.
Bul týraly Nege.kz basylymy jazdy.
“Kárim Másimovtiń úsh orynbasarynyń biri Marat Osipov bostandyqqa shyqty”, - delingen jazbada.
Eske salaiyq, 2023 jyly 24 sáýirde Astananyń qylmystyq ister jónindegi mamandandyrylǵan aýdanaralyq soty QR Ulttyq qaýipsizdik komitetiniń eks-tóraǵasy Kárim Másimovke, Ulttyq qaýipsizdik komiteti tóraǵasynyń burynǵy orynbasarlary Ánýar Sadyqulov, Dáýlet Erǵojin, Marat Osipovke qatysty qylmystyq is boiynsha úkim shyǵarǵan bolatyn. Sot isti "Asa qupiia" degen belgimen qarady. Kárim Másimov QR Qylmystyq kodeksiniń 175-babynyń 1-bóligi, 179-babynyń 3-bóligi, 362-babynyń 4-bóliginiń 3-tarmaǵy boiynsha kináli dep tanylyp, 18 jyl bas bostandyǵynan aiyryldy. Sonymen birge memlekettik qyzmette ómir boiy qyzmet ete almaidy jáne múlki tárkilenedi. Al onyń orynbasarlary Ánýar Sadyqulov 16 jylǵa bas bostandyǵynan aiyrylsa, Dáýlet Erǵojin koloniiaǵa 15 jylǵa ketti. Al Marat Osipov 3 jylǵa sottalǵan bolatyn.
Qańtarda Qazaqstanda tártipsizdikke ulasqan jappai narazylyq aktsiialarynan keiin joǵary shendi barlaý qyzmetkerlerin ustaý bastaldy. Aldymen Kárim Másimov Ulttyq qaýipsizdik komitetiniń basshysy qyzmetinen alynyp, memleketke opasyzdyq jasady degen kúdikpen qamaýǵa alyndy. Onyń ornyna Ermek Saǵymbaev taǵaiyndaldy. Ulttyq qaýipsizdik komiteti basshysynyń orynbasarlary Ánýar Sadyqulov pen Dáýlet Erǵojin de qyzmetinen bosatyldy.
13 qańtarda Másimov bilikti kúshpen basyp alýǵa jáne bilikti asyra paidalanýǵa baǵyttalǵan áreketterge bailanysty kúdikke ilingeni belgili boldy. Sadyqulov pen Erǵojinniń ustalǵany týraly da habar tarady. Keiin Másimov pen Sadyqulovty sot qamaýǵa alyp, is "óte qupiia" dep tanyldy. 7 aqpanda Erǵojin de sottyń nusqaýymen qamaýǵa alyndy. 8 aqpanda UQK "A" arnaiy maqsattaǵy qyzmetiniń direktory men atalǵan qyzmet ortalyǵynyń basshysy ustalǵany, al 23 aqpanda komitet basshysynyń taǵy bir eks-orynbasary Marat Osipov qolǵa túskeni belgili boldy.
10 naýryzda UQK Másimovke taǵylǵan aiyptar taǵy da qosyldy. Ol komitetti basqarǵan kezde jabyq kelisim-sharttardyń biri boiynsha shet memleket ókilderinen 2 million dollar kóleminde para aldy degen aiyp taǵylǵanyn habarlady. Sondai-aq kásipkerlik qurylymdardyń birinen joǵaryda atalǵan elitalyq qonaq úi men Nur-Sultan qalasyndaǵy jer telimin zańsyz alǵan. Úiden iri kólemdegi qolma-qol shetel valiýtasy, sándi zattar men basqa da qundylyqtar tabyldy. Másimovtiń múlkine baǵa berilip, resmi derekterdegi keibir sáikessizdikterdi anyqtaldy. Sonymen qatar, UQK kórsetken Másimovtiń úii buryn Nazarbaevtyń memlekettik rezidentsiiasy bolǵany anyqtaldy.
16 naýryzda Toqaev qaýipsizdik kúshteriniń qańtardaǵy jospary el basshylyǵyn ketirý ekenin aitty.
5 qańtarda Bas prokýror Berik Asylov Májiliste Másimovtiń isin qupiiasyzdandyrý ulttyq qaýipsizdik múddelerine nuqsan keltirýi múmkin ekenin aitty. Sonymen qatar onyń aitýynsha, Másimov qańtardaǵy tártipsizdikterdi uiymdastyrýshylardyń biri bolyp tabylady.
