Másimov táýbesine túse me?
Dosaev ketti. Ne ózgerdi? Ne ózgeredi? Eshteńe.
Jer kodeksiniń dúdámal baptaryn qaita qarap, ony tolyqtyryp nemese sol kúii qaldyryp, uzaq ýaqyt túsindirer, aqyry halyq búgingi tebininen qaityp, jalyǵar... Al Úkimet she?
Barlyq kiná Dosaev tobynyń durys túsindire almaýynan bolsa, onda jarasy jeńil, ol ketti, endi eshqandai basy artyq áńgime bolmaýy tiis.
Al sol zańdy tek qana Dosaev basqarǵan ministrlik ázirlegen joq qoi. Másimov Úkimetiniń basqa mekemeleri de sol zańdy qaraǵandyǵy, ony álde neshe ret pysyqtaǵany anyq. Solai bola tura Prezident aitpaqshy «halyqqa unamaityn zańdy» ázirlegen, ony elge usynǵan Másimov úkimeti nege bir aýyz sóz aitpady. Másimov nege táýbesine túspedi?! Másimovty ustap turǵan qandai kúsh?
Osydan 4-5 jyl buryn memlekettik BAQ-tarda Másimovtyń sýretterin jariialamaityn naýqan bolyp edi. Kópke sozylǵan joq. Ol jyldary neden jazyqty bolǵanyn bilmeimiz... tyǵyryqtan tez shyqty. Álde ony táýbesine túsirý úshin Prezident apparaty sondai «ishki jazalaýdy» qolǵa alǵany jón be? Aqyl aitatyn biz emes, eldiń Úkimetke, bilikke senimin shaiqap, tipti neshetúrli alypqashpa áńgimege arqaý bolǵan Jer kodeksiniń jazasyn tek Dosaev emes, Másimov te arqalaýy kerek.
Bir bilerimiz, Másimov otstavkaǵa ketpeidi. Ondai qudiret joq bizde... Keibir derekter ony Resei men Qytaidyń ortaq adamy deidi. Ekeýiniń de múddesin osy Másimov qorǵap otyr. Endi bir aqparat kózderi ol Prezident otbasymen eń jaqyn seriktes, anda desedi. Kim bilgen?!..
Másimov Premer bolǵaly beri rasymen de krizisten kóz ashpadyq. Úleskerler shýy, kredit týraly daý-janjal, «úsh tuǵyrly til», dini alaýyzdyq, terroristik áreketterdiń kórinis berýi, birneshe dúrkin tabiǵat apaty boldy, oǵan endi jer daýyn qosyńyz. Sonda da Másimovtyń eshteńesi qisaiǵan joq. Qansha ministr aýysty, ustaldy, qamaldy, shetke qashty. Tek Másimov myzǵyr emes...
Másimov te sál de bolsa uiat bolsa, osy joly tym quryǵanda halyqtan keshirim surar edi. Joq, onyń eshqashan halyq aldynda aqtarylǵanyn kórgen emespiz. Kórmeitin de siiaqtymyz. Bárin murty astynan kúlip, jasyryn jónge salyp keledi.
Osy joly Prezident Nazarbaev halyqtyń shyn yqylasyna ie bolam dese, mindetti túrde Másimovty jazasyz qaldyrmaýǵa tiis. Onsyz myna halyqtyń ashýy tarqaýy qiyn.
Qashan aitty demeńiz, túptiń túbinde Másimov bárine jaýap beredi. Ol kún týady.
