UQK-nyń baspasóz qyzmeti 25 tamyzda osylai dep málimdedi. Komitet sonymen birge laýazymdy tulǵalar D.Akipov jáne N.Bekmurattyń isi boiynsha da tergeý aiaqtalǵanyn jetkizdi.
Másimov pen Sadyqulovtyń áreketteri "memleketke opasyzdyq jasaý" ( 175-bap), "bilikti kúshpen basyp alý" (179-bap), "bilikti asyra paidalaný" (362-bap);
Erǵojinniń áreketi – "bilikti kúshpen basyp alý", "bilikti asyra paidalaný";
Ósipov, Akipov pen Bekmurattyń áreketi "bilikti asyra paidalaný" baptary boiynsha saralanǵan.
"Qazirgi ýaqytta kúdiktilerdi is materialdarymen tanystyrý júrgizilip jatyr" dep jazylǵan UQK-nyń beisenbi kúngi habarlamasynda.
Másimovtiń qamaý merzimi 6 qazanǵa deiin, Erǵojinniń qamaý merzimi 13 qazan, Ósipovtiń qamaý merzimi 22 qazanǵa deiin uzartylǵan.
UQK buǵan deiin Másimov isi boiynsha burynǵy prezident Nursultan Nazarbaevtyń nemere inisi Samat Ábishtiń tergelgenin aitqan. Biraq onyń mártebesi belgisiz qalǵan.
Kóp jyl boiy Qazaqstannyń burynǵy prezidenti Nursultan Nazarbaevtyń senimdi serigi bolǵan Kárim Másimov 5 qańtarda qamalǵan. Ol sol kúni Qazaqstan qaýipsizdik keńesiniń otyrysyna qatysqan. Osy otyrysta Prezident Qasym-Jomart Toqaev keńes tóraǵalyǵyn óz moiyna alǵanyn jáne Qazaqstanǵa "halyqaralyq terroristik top" shabýyl jasaǵanyn málimdegen-di.
8 qańtarda UQK "memleketke opasyzdyq jasady" degen kúdikpen Kárim Másimovtiń qamaýǵa alynǵanyn, 13 qańtarda "bilikti kúshpen basyp alý" baby boiynsha da is qozǵalǵanyn habarlaǵan.
Naýryz aiynda UQK "memleketke opasyzdyq jasaý, bilikti kúshpen basyp alý jáne asa iri kólemde para alý" baptary boiynsha 15 qylmystyq is qozǵalǵanyn jariialaǵan edi. Onyń ishinde Kárim Másimov pen onyń úsh orynbasary (22 aqpanda taǵy bir orynbasary Marat Ósipov qamalǵan) atalǵan.
Bas prokýratýra munan ózge UQK-niń úsh departamentiniń basshysy pen politsiianyń eki departamenti basshysynyń ustalǵanyn málimdegen. Olarǵa "qańtardaǵy dúrbeleń kezinde vedomstvo ǵimarattaryn tastap ketti" degen aiyp taǵylǵan.
Mamyr aiynyń sońynda, Qańtar oqiǵasynan 5 aidan keiin prezident Qasym-Jomart Toqaev Ulttyq qaýipsizdik komitetin reformalaý týraly jarlyqqa qol qoiǵan.
