ۇقك-نىڭ باسپا ءسوز قىزمەتى 25 تامىزدا وسىلاي دەپ مالىمدەدى. كوميتەت سونىمەن بىرگە لاۋازىمدى تۇلعالار د.اكيپوۆ جانە ن.بەكمۇراتتىڭ ءىسى بويىنشا دا تەرگەۋ اياقتالعانىن جەتكىزدى.
ءماسىموۆ پەن سادىقۇلوۆتىڭ ارەكەتتەرى "مەملەكەتكە وپاسىزدىق جاساۋ" ( 175-باپ)، "بيلىكتى كۇشپەن باسىپ الۋ" (179-باپ)، "بيلىكتى اسىرا پايدالانۋ" (362-باپ)؛
ەرعوجيننىڭ ارەكەتى – "بيلىكتى كۇشپەن باسىپ الۋ"، "بيلىكتى اسىرا پايدالانۋ"؛
ءوسىپوۆ، اكيپوۆ پەن بەكمۇراتتىڭ ارەكەتى "بيلىكتى اسىرا پايدالانۋ" باپتارى بويىنشا سارالانعان.
"قازىرگى ۋاقىتتا كۇدىكتىلەردى ءىس ماتەريالدارىمەن تانىستىرۋ جۇرگىزىلىپ جاتىر" دەپ جازىلعان ۇقك-نىڭ بەيسەنبى كۇنگى حابارلاماسىندا.
ءماسىموۆتىڭ قاماۋ مەرزىمى 6 قازانعا دەيىن، ەرعوجيننىڭ قاماۋ مەرزىمى 13 قازان، ءوسىپوۆتىڭ قاماۋ مەرزىمى 22 قازانعا دەيىن ۇزارتىلعان.
ۇقك بۇعان دەيىن ءماسىموۆ ءىسى بويىنشا بۇرىنعى پرەزيدەنت نۇرسۇلتان نازاربايەۆتىڭ نەمەرە ءىنىسى سامات ءابىشتىڭ تەرگەلگەنىن ايتقان. ءبىراق ونىڭ مارتەبەسى بەلگىسىز قالعان.
كوپ جىل بويى قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ سەنىمدى سەرىگى بولعان كارىم ءماسىموۆ 5 قاڭتاردا قامالعان. ول سول كۇنى قازاقستان قاۋىپسىزدىك كەڭەسىنىڭ وتىرىسىنا قاتىسقان. وسى وتىرىستا پرەزيدەنت قاسىم-جومارت توقايەۆ كەڭەس ءتوراعالىعىن ءوز مويىنا العانىن جانە قازاقستانعا "حالىقارالىق تەرروريستىك توپ" شابۋىل جاساعانىن مالىمدەگەن-دى.
8 قاڭتاردا ۇقك "مەملەكەتكە وپاسىزدىق جاسادى" دەگەن كۇدىكپەن كارىم ءماسىموۆتىڭ قاماۋعا الىنعانىن، 13 قاڭتاردا "بيلىكتى كۇشپەن باسىپ الۋ" بابى بويىنشا دا ءىس قوزعالعانىن حابارلاعان.
ناۋرىز ايىندا ۇقك "مەملەكەتكە وپاسىزدىق جاساۋ، بيلىكتى كۇشپەن باسىپ الۋ جانە اسا ءىرى كولەمدە پارا الۋ" باپتارى بويىنشا 15 قىلمىستىق ءىس قوزعالعانىن جاريالاعان ەدى. ونىڭ ىشىندە كارىم ءماسىموۆ پەن ونىڭ ءۇش ورىنباسارى (22 اقپاندا تاعى ءبىر ورىنباسارى مارات ءوسىپوۆ قامالعان) اتالعان.
باس پروكۋراتۋرا مۇنان وزگە ۇقك-نىڭ ءۇش دەپارتامەنتىنىڭ باسشىسى پەن پوليسيانىڭ ەكى دەپارتامەنتى باسشىسىنىڭ ۇستالعانىن مالىمدەگەن. ولارعا "قاڭتارداعى دۇربەلەڭ كەزىندە ۆەدومستۆو عيماراتتارىن تاستاپ كەتتى" دەگەن ايىپ تاعىلعان.
مامىر ايىنىڭ سوڭىندا، قاڭتار وقيعاسىنان 5 ايدان كەيىن پرەزيدەنت قاسىم-جومارت توقايەۆ ۇلتتىق قاۋىپسىزدىك كوميتەتىن رەفورمالاۋ تۋرالى جارلىققا قول قويعان.
