“Quqyqtyq media ortalyq” qoǵamdyq uiymynyń direktory Diana Okremova eldegi júrgizýshi kýáligin alý máselesin kóterdi, dep habarlaidy Dalanews.kz.
Buǵan deiin senator Marat Qojaev júrgizýshi kýáligin alý tártibin qatańdatýdy usynǵan edi. Ol jol-kólik oqiǵalarynyń qorqynyshty statistikasyn keltirip, bul máseleni avto-mektepterdiń álsiz daiyndyǵymen bailanystyrdy. Senatordyń aitýynsha, elimizde júrgizýshi kýáligin alý tym ońai.
Alaida “Quqyqtyq media ortalyq” qoǵamdyq uiymynyń direktory Diana Okremovanyń pikirinshe, másele avto-mektepterde emes, túp-tamyry tereńge ketken jemqorlyqta. Onyń sózinshe, Qazaqstanda júrgizýshi kýáligin alý ǵana emes, ony satyp alý da qiyndyq týdyrmaidy.
“Júrgizýshi kýáligin alý ońai emes – ony satyp alý tipti ońai! Ol úshin zańsyz jol izdeýdiń de qajeti joq – AvtoTsON-nyń 2GIS qosymshasyndaǵy pikirlerdi ashsańyz, “kómekshilerdiń” bailanystary ashyq kórsetilgen”, – deidi Diana Okremova.
Ol júrgizýshi kýáliginiń qunyn anyqtaý maqsatynda qyzyǵýshylyq tanytyp, zertteý júrgizgenin aitady.
“Qazirgi naryqtaǵy baǵasy – 220 myń teńge. Bar bolǵany birneshe saǵattyń ishinde, eń kóbi bir kúnde daiyn bolyp shyǵady. Naǵyz “servis” dersiń!” – dep mysqyldady ol.
Onyń sózinshe, aqyly túrde eshqandai oqý-jattyǵýsyz, úiden shyqpai-aq qujat alýǵa múmkindik bolsa, júrgizýshilerdi daiarlaý sapasyn kóterý týraly aitý maǵynasyz.
“Qansha talapty kúsheitkenmen, júrgizýshi kýáligi satylatyn bolsa, bul esh nátije bermeidi. Eger júie sol qalpy qalsa, depýtat naqty ne nárseni qatańdatpaq?” – dep túiindedi Diana Okremova.
Eske salaiyq, buǵan deiin Senat depýtaty Marat Qojaev Qazaqstanda júrgizýshi kýáligin alý talaptary jeńil bolǵandyqtan, jol jaǵdaiy da kúrdeli ekenin jetkizgen bolatyn.
“Elimizde jol infraqurylymy qaýipsizdik standarttaryna tolyq sai emes. Sonymen qatar avto mektepterdegi bilim berý protsesi kóbine formaldy túrde ótedi. Sondyqtan bul salada baqylaýdy kúsheitý qajet”, – dedi ol.
Senatordyń aitýynsha, basqa eldermen salystyrǵanda Qazaqstanda júrgizýshi kýáligin alý áldeqaida ońai.
“Shetelde bul máselege erekshe jaýapkershilikpen qaraidy. Al bizde kólik júrgizý mádenieti álsiz. Ony jańa oqytý baǵdarlamalary arqyly jaqsartýymyz kerek”, – dedi Marat Qojaev.
