“قۇقىقتىق مەديا ورتالىق” قوعامدىق ۇيىمىنىڭ ديرەكتورى ديانا وكرەموۆا ەلدەگى جۇرگىزۋشى كۋالىگىن الۋ ماسەلەسىن كوتەردى، دەپ حابارلايدى Dalanews.kz.
بۇعان دەيىن سەناتور مارات قوجايەۆ جۇرگىزۋشى كۋالىگىن الۋ ءتارتىبىن قاتاڭداتۋدى ۇسىنعان ەدى. ول جول-كولىك وقيعالارىنىڭ قورقىنىشتى ستاتيستيكاسىن كەلتىرىپ، بۇل ماسەلەنى اۆتو-مەكتەپتەردىڭ ءالسىز دايىندىعىمەن بايلانىستىردى. سەناتوردىڭ ايتۋىنشا، ەلىمىزدە جۇرگىزۋشى كۋالىگىن الۋ تىم وڭاي.
الايدا “قۇقىقتىق مەديا ورتالىق” قوعامدىق ۇيىمىنىڭ ديرەكتورى ديانا وكرەموۆانىڭ پىكىرىنشە، ماسەلە اۆتو-مەكتەپتەردە ەمەس، ءتۇپ-تامىرى تەرەڭگە كەتكەن جەمقورلىقتا. ونىڭ سوزىنشە، قازاقستاندا جۇرگىزۋشى كۋالىگىن الۋ عانا ەمەس، ونى ساتىپ الۋ دا قيىندىق تۋدىرمايدى.
“جۇرگىزۋشى كۋالىگىن الۋ وڭاي ەمەس – ونى ساتىپ الۋ ءتىپتى وڭاي! ول ءۇشىن زاڭسىز جول ىزدەۋدىڭ دە قاجەتى جوق – اۆتوسون-نىڭ 2گيس قوسىمشاسىنداعى پىكىرلەردى اشساڭىز، “كومەكشىلەردىڭ” بايلانىستارى اشىق كورسەتىلگەن”، – دەيدى ديانا وكرەموۆا.
ول جۇرگىزۋشى كۋالىگىنىڭ قۇنىن انىقتاۋ ماقساتىندا قىزىعۋشىلىق تانىتىپ، زەرتتەۋ جۇرگىزگەنىن ايتادى.
“قازىرگى نارىقتاعى باعاسى – 220 مىڭ تەڭگە. بار بولعانى بىرنەشە ساعاتتىڭ ىشىندە، ەڭ كوبى ءبىر كۇندە دايىن بولىپ شىعادى. ناعىز “سەرۆيس” دەرسىڭ!” – دەپ مىسقىلدادى ول.
ونىڭ سوزىنشە، اقىلى تۇردە ەشقانداي وقۋ-جاتتىعۋسىز، ۇيدەن شىقپاي-اق قۇجات الۋعا مۇمكىندىك بولسا، جۇرگىزۋشىلەردى دايارلاۋ ساپاسىن كوتەرۋ تۋرالى ايتۋ ماعىناسىز.
“قانشا تالاپتى كۇشەيتكەنمەن، جۇرگىزۋشى كۋالىگى ساتىلاتىن بولسا، بۇل ەش ناتيجە بەرمەيدى. ەگەر جۇيە سول قالپى قالسا، دەپۋتات ناقتى نە نارسەنى قاتاڭداتپاق؟” – دەپ تۇيىندەدى ديانا وكرەموۆا.
ەسكە سالايىق، بۇعان دەيىن سەنات دەپۋتاتى مارات قوجايەۆ قازاقستاندا جۇرگىزۋشى كۋالىگىن الۋ تالاپتارى جەڭىل بولعاندىقتان، جول جاعدايى دا كۇردەلى ەكەنىن جەتكىزگەن بولاتىن.
“ەلىمىزدە جول ينفراقۇرىلىمى قاۋىپسىزدىك ستاندارتتارىنا تولىق ساي ەمەس. سونىمەن قاتار اۆتو مەكتەپتەردەگى ءبىلىم بەرۋ پروسەسى كوبىنە فورمالدى تۇردە وتەدى. سوندىقتان بۇل سالادا باقىلاۋدى كۇشەيتۋ قاجەت”، – دەدى ول.
سەناتوردىڭ ايتۋىنشا، باسقا ەلدەرمەن سالىستىرعاندا قازاقستاندا جۇرگىزۋشى كۋالىگىن الۋ الدەقايدا وڭاي.
“شەتەلدە بۇل ماسەلەگە ەرەكشە جاۋاپكەرشىلىكپەن قارايدى. ال بىزدە كولىك جۇرگىزۋ مادەنيەتى ءالسىز. ونى جاڭا وقىتۋ باعدارلامالارى ارقىلى جاقسارتۋىمىز كەرەك”، – دەدى مارات قوجايەۆ.
