Atyraý oblysy Jangeldin aýylyndaǵy otbasynyń ólimine qatysty sot protsesi jalǵasyp jatyr. Kezekti otyrysta kýágerler qojaiyndary joǵalǵannan keiin olardyń malyna qalai qaraǵanyn jáne marqum Naýryz Muqanǵalievtiń telefonynan kelgen habarlamalar týraly aityp berdi, dep dalanews.kz tilshisi "Aq Jaiyq" basylymyna silteme jasap habarlaidy.
Sotta sońǵy bolyp jaýap bergen eki kýáger de Qarabalinder otbasynyń malyna qaraǵan adamdar bolyp shyqty.
Birinshi kýáger Jangeldin aýyly turǵyndarynyń malyn baǵýmen ainalysatynyn aitty. Onyń sózinshe, Maqsot Qarabalinniń maly da onyń qaraýynda bolǵan. Ótken jyldyń kúzinde ol jaiylymda júrgen siyrlardy óz qorasyna kirgizgen. Buǵan otbasynyń kórshisi úi ieleriniń joq ekenin aityp, malǵa qarap turýdy ótingen soń kelisken.
Kýáger ár siyrdy baqqany úshin 4 myń teńgeden alyp otyrǵanyn jetkizdi.
Ekinshi kýágerdiń aitýynsha, otbasy ketkennen keiin oǵan qorada qalǵan maldy jemdep, sýaryp turý usynylǵan. Oǵan úi ieleri Tashkentte emdelip jatyr dep aitylǵan. Bul jumysy úshin kúnine 3 myń teńge tóleýge kelisken.
Kýáger aqshanyń kún saiyn emes, ara-tura aýdarylyp otyrǵanyn aitty. Budan bólek, qoi baqqany úshin oǵan jeke 10 myń teńge tólengen. Onyń sózinshe, aqsha aýdarymdary shamamen 23-25 qańtarǵa deiin kelip turǵan.
Keiin Naýryz Muqanǵalievtiń nómirinen WhatsApp arqyly aqshanyń ornyna bir baspaqty alyp ketý týraly habarlama kelgen.
"Qazir aqsham joq, bir baspaqty alyp kete alasyń ba?" – dep kýáger hattyń mazmunyn jetkizdi.
Osydan keiin ol maldy alyp ketkenin aitty.
Keiin marqumdardyń týystary maldyń qaida ketkenin anyqtai bastaǵan. Maqsot Qarabalinniń qaryndasy kýágerden maldyń ne úshin satylǵanyn suraǵan.
"Men mal satýǵa qatysqan joqpyn. Olar ózara kelisip alǵan. Maǵan úi ieleri Tashkentte júr dep aitty. Men olar jaqynda qaityp keledi dep oiladym", – dedi kýáger sotta.
Kýáger habarlamalar ózinde Naýryz Muqanǵalievtiń nómiri retinde saqtalǵan telefonnan kelgenin aitty. Onyń sózinshe, buryn ekeýi birge namaz oqyǵandyqtan, jazyp otyrǵan adamnyń Naýryz ekenine kúmándanbaǵan.
Sýdia qazirgi kezde telefon arqyly jasalatyn alaiaqtyq jiilegenin eske salyp, mundai habarlamalar kúdik týdyrýy múmkin ekenin aitty. Alaida kýáger sońǵy eki jylda Naýryzben aralaspasa da, hatty sol adam jazyp otyr dep oilaǵanyn jetkizdi.
Suraq-jaýap kezinde marqum Maqsot Qarabalinniń qaryndasy qujat boiynsha aǵasynda 11 bas iri qara bolǵanyn aitty. Onyń sózinshe, qazir on maldyń ǵana qaida ekeni belgili, al taǵy bir siyrdyń taǵdyry beimálim.
Kýáger ózine qaraýǵa 10 bas mal berilgenin aityp jaýap berdi. Sonymen qatar ol buryn jaiylymnan alyp kelgen mal sany tórt emes, úsh siyr bolǵanyn naqtylady. Onyń aitýynsha, bul sandar otbasy ieligindegi jalpy mal sanymen bailanysty emes.
Kýágerlerden jaýap alý aiaqtalǵan soń sot is materialdaryn zertteýge kóshti.
Protseske qatysýshylarǵa Jangeldin aýylyndaǵy úidiń qorasynan tabylǵan Maqsot Qarabalin men onyń jubaiy Násip Óteshqalievanyń súiegin eksgýmatsiialaý barysy túsirilgen beinematerialdar kórsetildi.
Sýdia súiek qaldyqtary kórinetin kadrlardy túsirýge jáne jariialaýǵa tyiym saldy. Onyń aitýynsha, mundai kórinister adamdarǵa psihologiialyq turǵydan aýyr áser etýi múmkin. Al qazba jumystary bastalǵanǵa deiingi beinejazbany kórsetýge ruqsat berildi.
Materialdardy qaraý kezinde marqumnyń ápkeleri kóz jasyna erik berdi. Al aiyptalýshy Sultan Sársemáliev ekranǵa qarap, beinematerialdardy únsiz baqylap turdy.
