Almaty – Qorǵas tas jolynda mas kúiinde kólik júrgizip, úsh adamnyń ólimine sebep bolǵan politsiia maiory Abylai Jarylqasynulyna sot úkimi shyqty, dep habarlaidy dalanews.kz.
Sot ony Qazaqstan Respýblikasy Qylmystyq kodeksiniń 345-1-babynyń 4-bóligi boiynsha kináli dep tanydy.
"Abylai Jarylqasynuly kólik quralyn basqarý quqyǵynan ómir boiyna aiyrylyp, 10 jylǵa bas bostandyǵynan aiyrylsyn", – dedi sýdia úkimdi jariialaý kezinde.
Eske salaiyq, qaiǵyly jol apaty 23 maýsymda Almaty – Shelek – Qorǵas avtojolynyń 132-shaqyrymynda bolǵan. Tergeý dereginshe, Haval kóligin basqarǵan politsiia qyzmetkeri qarsy qozǵalys jolaǵyna shyǵyp ketip, Audi 100 avtokóligimen soqtyǵysqan.
Qatty soqqy saldarynan Audi júrgizýshisi men onyń eki jolaýshysy oqiǵa ornynda kóz jumdy. Al Haval kóliginde Abylai Jarylqasynulymen birge Aidar Rústembekov esimdi jolaýshy bolǵan.
Saraptama qorytyndysy politsiia qyzmetkeriniń qanynan 3,3 promille etil spirti tabylǵanyn kórsetken. Bul onyń jol apaty bolǵan kezde aýyr dárejede mas bolǵanyn bildiredi.
Abylai Jarylqasynuly ishki ister organdarynda 15 jyldan astam ýaqyt qyzmet etken jáne politsiia maiory shenin ielengen. Endi ol jazasyn qylmystyq-atqarý júiesi mekemesinde óteidi.
