الماتى – قورعاس تاس جولىندا ماس كٷيٸندە كٶلٸك جٷرگٸزٸپ, ٷش ادامنىڭ ٶلٸمٸنە سەبەپ بولعان پوليتسييا مايورى ابىلاي جارىلقاسىنۇلىنا سوت ٷكٸمٸ شىقتى, دەپ حابارلايدى dalanews.kz.
سوت ونى قازاقستان رەسپۋبليكاسى قىلمىستىق كودەكسٸنٸڭ 345-1-بابىنىڭ 4-بٶلٸگٸ بويىنشا كٸنەلٸ دەپ تانىدى.
"ابىلاي جارىلقاسىنۇلى كٶلٸك قۇرالىن باسقارۋ قۇقىعىنان ٶمٸر بويىنا ايىرىلىپ, 10 جىلعا باس بوستاندىعىنان ايىرىلسىن", – دەدٸ سۋديا ٷكٸمدٸ جارييالاۋ كەزٸندە.
ەسكە سالايىق, قايعىلى جول اپاتى 23 ماۋسىمدا الماتى – شەلەك – قورعاس اۆتوجولىنىڭ 132-شاقىرىمىندا بولعان. تەرگەۋ دەرەگٸنشە, Haval كٶلٸگٸن باسقارعان پوليتسييا قىزمەتكەرٸ قارسى قوزعالىس جولاعىنا شىعىپ كەتٸپ, Audi 100 اۆتوكٶلٸگٸمەن سوقتىعىسقان.
قاتتى سوققى سالدارىنان Audi جٷرگٸزۋشٸسٸ مەن ونىڭ ەكٸ جولاۋشىسى وقيعا ورنىندا كٶز جۇمدى. ال Haval كٶلٸگٸندە ابىلاي جارىلقاسىنۇلىمەن بٸرگە ايدار رٷستەمبەكوۆ ەسٸمدٸ جولاۋشى بولعان.
ساراپتاما قورىتىندىسى پوليتسييا قىزمەتكەرٸنٸڭ قانىنان 3,3 پروميللە ەتيل سپيرتٸ تابىلعانىن كٶرسەتكەن. بۇل ونىڭ جول اپاتى بولعان كەزدە اۋىر دەرەجەدە ماس بولعانىن بٸلدٸرەدٸ.
ابىلاي جارىلقاسىنۇلى ٸشكٸ ٸستەر ورگاندارىندا 15 جىلدان استام ۋاقىت قىزمەت ەتكەن جەنە پوليتسييا مايورى شەنٸن يەلەنگەن. ەندٸ ول جازاسىن قىلمىستىق-اتقارۋ جٷيەسٸ مەكەمەسٸندە ٶتەيدٸ.
