Atyraýda 16 jastaǵy mektep oqýshysy muryn qýysyna jasalǵan otadan keiin kóz jumdy. Marqumnyń ata-anasy bolǵan jaǵdaidyń mán-jaiyn tolyq anyqtap, ádil tergeý júrgizýdi talap etip otyr, dep habarlaidy dalanews.kz.
Anasynyń aitýynsha, qyzy aýrýhanaǵa muryn ishindegi kistany alyp tastaý úshin josparly túrde túsken. Dárigerler ota jeńil ótetinin, shamamen 20 minýtqa sozylatynyn aitqan.
Alaida 19 tamyz kúni jasalǵan otadan keiin qyzdyń jaǵdaiy kúrt nasharlaǵan. Anasy meditsinalyq dákeniń bir bóligi tynys alý jolyna ketip qalyp, qyzynyń demi taryla bastaǵanyn aitady. Sodan keiin onyń densaýlyǵy aýyrlap, túrli asqynýlar paida bolǵan.
Qyz 7 qyrkúiekte, iaǵni otadan keiin 19 kún ótken soń qaitys boldy.
Atyraý oblystyq Densaýlyq saqtaý basqarmasy mundai otalardyń kúrdeli sanatqa jatatynyn jáne belgili bir qaýip-qatermen bailanysty bolatynyn málimdedi. Vedomstvonyń habarlaýynsha, naýqasty emdeýge jergilikti dárigerlermen qatar respýblikalyq deńgeidegi mamandar da tartylǵan.
Qazir oqiǵaǵa qatysty qyzmettik tekserý júrgizilip jatyr. Qyzdyń ólimine ne sebep bolǵany saraptama qorytyndysynan keiin belgili bolady. Al ata-anasy jaǵdaiǵa kináli adamdar jaýapqa tartylýy tiis dep esepteidi.
