Marqum politsiia qyzmetkeri Dastan Ábdiqanovtyń (tómende sýrette) áieli Almatydaǵy blok-bekette oiran salǵan júrgizýshiniń óziniń kúieýimen birge jumys istegenin aitty, dep habarlaidy Dalanews.kz Instagramdaǵy ztb_kz paraqshasyna silteme jasap.
"Blok-bekette oiran salǵan kólik júrgizýshisi buryn politsiiada jumys istegen degen ótirik. Ol politsiiada jumys istep júrgen adam bolatyn. Ol meniń kúieýimmen birge túngi aýysymǵa shyqqan. Ózim ekeýine jumysqa keterde tamaq daiyndap bergenmin.
Kúieýimniń áriptesteriniń barlyǵynyń túrin jaqsy tanimyn. Ótinemin, shyndyqty aityńyzdar! Keremet áke, jaqsy otaǵasyn óltirgen qandyqoldy búrkelemeńizder bulai! Qaitys bolǵan súiiktimizdiń abyroiyna nuqsan keltirmeńizder", - dedi Dastan Abdyqanovtyń áieli.
Marqumnyń jesiri kúieýiniń abyroiyna nuqsan keltirmeýin jáne tergeýdi ádil júrgizýdi suraidy.
Aldynda quzyrly organ "eki politsiia qyzmetkeriniń ólimine sebepker mas kólik júrgizýshisiniń politsiiada jumys isteidi" degen aqparatty joqqa shyǵardy. Alaida, búgin politsiia bastyǵy Qanat Taimerdenov kúdiktiniń organda jumys istegenin moiyndady, biraq óz mindetterin jaýapty oryndamaǵany úshin jumystan bosatylǵanyn aitty.
"Blok-bekette bolǵan qaiǵyly oqiǵa birden ishki ister organdarynda qyzmet etken eki politsiia qyzmetkeriniń ómirin qidy. Biraq qaiǵyly oqiǵaǵa sebepker bolǵan júrgizýshiniń buryn pogon taqqan adam bolýy odan saiyn janymyzdy aýyrtyp otyr. Alty jyl politsiiada jumys istegen ol qyzmettik mindetterin tiisti oryndamaǵany úshin tórt ret tártiptik jazaǵa tartylǵan. Aqyry onyń ishki ister organdarynan ketýine osynysy sebep boldy. Biraq, ókinishke qarai, odan keiin de ol budan sabaq alyp, eshqandai qorytyndy jasamaǵan. Zańdy belden basyp, aqyry aýyr zardapqa ákelip soǵatyn bile tura, mas kúiinde rýlge otyryp, qylmys jasady", - dedi Almaty politsiiasynyń bastyǵy Qanat Taimerdenov.
Azamat A.-ǵa qatysty eki nemese odan da kóp adamdy óltirgeni úshin Qazaqstan Respýblikasy Qylmystyq kodeksiniń 99-babynyń 2-bóligi, iaǵni "Adam óltirý" (15 jyldan 20 jylǵa deiin bas bostandyǵynan aiyrýǵa nemese ómir boiyna bas bostandyǵynan aiyrýǵa) boiynsha sotqa deiingi tergeý bastaldy.
Qazir ol qamaýda.
