مارقۇم پوليسيا قىزمەتكەرى داستان ءابدىقانوۆتىڭ (تومەندە سۋرەتتە) ايەلى الماتىداعى بلوك-بەكەتتە ويران سالعان جۇرگىزۋشىنىڭ ءوزىنىڭ كۇيەۋىمەن بىرگە جۇمىس ىستەگەنىن ايتتى، دەپ حابارلايدى Dalanews.kz ينستاگرامداعى ztb_kz پاراقشاسىنا سىلتەمە جاساپ.
"بلوك-بەكەتتە ويران سالعان كولىك جۇرگىزۋشىسى بۇرىن پوليسيادا جۇمىس ىستەگەن دەگەن وتىرىك. ول پوليسيادا جۇمىس ىستەپ جۇرگەن ادام بولاتىن. ول مەنىڭ كۇيەۋىممەن بىرگە تۇنگى اۋىسىمعا شىققان. ءوزىم ەكەۋىنە جۇمىسقا كەتەردە تاماق دايىنداپ بەرگەنمىن.
كۇيەۋىمنىڭ ارىپتەستەرىنىڭ بارلىعىنىڭ ءتۇرىن جاقسى تانيمىن. وتىنەمىن، شىندىقتى ايتىڭىزدار! كەرەمەت اكە، جاقسى وتاعاسىن ولتىرگەن قاندىقولدى بۇركەلەمەڭىزدەر بۇلاي! قايتىس بولعان سۇيىكتىمىزدىڭ ابىرويىنا نۇقسان كەلتىرمەڭىزدەر"، - دەدى داستان ابدىقانوۆتىڭ ايەلى.
مارقۇمنىڭ جەسىرى كۇيەۋىنىڭ ابىرويىنا نۇقسان كەلتىرمەۋىن جانە تەرگەۋدى ءادىل جۇرگىزۋدى سۇرايدى.
الدىندا قۇزىرلى ورگان "ەكى پوليسيا قىزمەتكەرىنىڭ ولىمىنە سەبەپكەر ماس كولىك جۇرگىزۋشىسىنىڭ پوليسيادا جۇمىس ىستەيدى" دەگەن اقپاراتتى جوققا شىعاردى. الايدا، بۇگىن پوليسيا باستىعى قانات تايمەردەنوۆ كۇدىكتىنىڭ ورگاندا جۇمىس ىستەگەنىن مويىندادى، ءبىراق ءوز مىندەتتەرىن جاۋاپتى ورىنداماعانى ءۇشىن جۇمىستان بوساتىلعانىن ايتتى.
"بلوك-بەكەتتە بولعان قايعىلى وقيعا بىردەن ىشكى ىستەر ورگاندارىندا قىزمەت ەتكەن ەكى پوليسيا قىزمەتكەرىنىڭ ءومىرىن قيدى. ءبىراق قايعىلى وقيعاعا سەبەپكەر بولعان جۇرگىزۋشىنىڭ بۇرىن پوگون تاققان ادام بولۋى ودان سايىن جانىمىزدى اۋىرتىپ وتىر. التى جىل پوليسيادا جۇمىس ىستەگەن ول قىزمەتتىك مىندەتتەرىن ءتيىستى ورىنداماعانى ءۇشىن ءتورت رەت تارتىپتىك جازاعا تارتىلعان. اقىرى ونىڭ ىشكى ىستەر ورگاندارىنان كەتۋىنە وسىنىسى سەبەپ بولدى. ءبىراق، وكىنىشكە قاراي، ودان كەيىن دە ول بۇدان ساباق الىپ، ەشقانداي قورىتىندى جاساماعان. زاڭدى بەلدەن باسىپ، اقىرى اۋىر زارداپقا اكەلىپ سوعاتىن بىلە تۇرا، ماس كۇيىندە رۋلگە وتىرىپ، قىلمىس جاسادى"، - دەدى الماتى پوليسياسىنىڭ باستىعى قانات تايمەردەنوۆ.
ازامات ا.-عا قاتىستى ەكى نەمەسە ودان دا كوپ ادامدى ولتىرگەنى ءۇشىن قازاقستان رەسپۋبليكاسى قىلمىستىق كودەكسىنىڭ 99-بابىنىڭ 2-بولىگى، ياعني "ادام ءولتىرۋ" (15 جىلدان 20 جىلعا دەيىن باس بوستاندىعىنان ايىرۋعا نەمەسە ءومىر بويىنا باس بوستاندىعىنان ايىرۋعا) بويىنشا سوتقا دەيىنگى تەرگەۋ باستالدى.
ءقازىر ول قاماۋدا.
