Marat Moldymanov: «Ónimdi birinshi sortty maqtadan jasaimyz»
Búginde Qazaqstan naryǵyna syrt elderden maqtadan jasalǵan meditsina men kosmetika salasyna qajetti kóptegen zattar keledi. Túrkitsan maqta zaýytynyń direktory Marat Moldymanov olardyń kópshiligi maqta qaldyqtarynan daiyndalatynyn ashyna aitty.
Oǵan kóz jetkizý úshin qyz-kelinshekter betin súrtetin maqta diskleriniń ortasyn ashyp qarasańyz, arasynda shań-tozańdy baiqaýǵa bolady eken. Tazalyq saqtaýǵa qajetti kosmetikalyq zattardyń bárin birinshi sortty, sapasy joǵary maqtadan jasaý kerek eken. Degenmen syrt elderdegi kásiporyndar ony saqtai bermeitini jasyryn emes.
Osy rette maqta óńdeý salasynda uzaq jyldan beri jumys istep kele jatuan Túrkistan maqta zaýytynyń direktory Marat Moldymanovqa «Elimizde bul baǵytta sizdermen básekelesetin kásiporyndar bar ma?» dep suraq qoiǵanymyzda mynadai jaýap aldyq.
– Búginde maqtany óńdeý isimen ainalysatyn kásiporyndar Jetisai aýdanda, Jambyl oblysynyń Qordai aýdanynda ashylǵan. Qazirgi tańda bizdiń jumysymyz maqta baǵasyna tikelei bailanysty. Biyl maqtanyń bir tonnasy 1800 dollardy qurady. Budan basqa Qazaqstannyń naryǵyna kórshiles Ózbekstannan maqtanyń qaldyqtary kóp kiredi. Onyń baǵasy arzan. Sondyqtan keibir maqta zaýyttary kórshi elden kelgen sapasy tómen maqtadan ónim daiyndaýǵa tyrysady. Bul óz kezeginde taýardyń sapasyna keri áser etetini belgili. Al bizder taýarymyzdyń sapasyn tómendetpeý úshin birinshi sortty maqtany paidalanýǵa tyrysamyz, – dep kókeide júrgen oiyn ortaǵa saldy.
Ókinishke orai, elimizdegi tutynýshylardyń kópshiligi birinshi sortty maqta men maqta qaldyǵynan daiyndalǵan ónimdi ajyrata bermeidi eken.
Dalanews.kz
