Ulttyq mereke – Respýblika kúni qarsańynda Prezident Qasym-Jomart Toqaevtyń Jarlyǵymen elimizdiń áleýmettik-ekonomikalyq jáne mádeni damýyna, halyqtar arasyndaǵy dostyq pen yntymaqty nyǵaitýǵa qosqan eleýli úlesi men belsendi qoǵamdyq qyzmeti úshin bir top azamat memlekettik nagradalarmen marapattaldy. Olardyń qatarynda bilim berý, densaýlyq saqtaý, mádeniet jáne ǵylym qairatkerleri, óndiris, biznes salalarynyń kórnekti ókilderi, depýtattar, memlekettik jáne quqyq qorǵaý organdarynyń qyzmetkerleri, áskeri qyzmetshiler, sportshylar jáne eńbek ardagerleri bar.
«Qazaqstannyń Eńbek Eri» ataǵy otandyq ǵylymdy damytýdaǵy airyqsha jetistikteri, sondai-aq qoǵamdyq qyzmettegi asa úzdik eńbegi úshin Prezident janyndaǵy Qazaqstan Respýblikasy Ulttyq ǵylym akademiiasynyń vitse-prezidenti A.Jumadildaevqa, eldiń áleýmettik-gýmanitarlyq damýyndaǵy asa úzdik jetistikteri úshin Almaty qalasy №4 arnaiy mektep-internatynyń muǵalimi G.Nurpeiisovaǵa, Oral qalasy A.Taimanov atyndaǵy №34 mektep-gimnaziiasynyń muǵalimi E.Traisovaǵa jáne óndiristik qyzmettegi erekshe eńbegi úshin Qaraǵandy oblysy «Shahterskoe» jaýapkershiligi shekteýli seriktestiginiń direktory G.Prokopqa berildi.
«Otan» ordenimen Kardiohirýrgiia jáne transplantologiia ǵylymi-klinikalyq ortalyǵynyń direktory S.Joshybaev pen kórnekti aqyn, Memlekettik syilyqtyń laýreaty N.Orazalin marapattaldy.
I dárejeli «Barys» ordeni Parlament Májilisi Tóraǵasynyń orynbasary A.Raýǵa, R.Baǵlanova atyndaǵy «Qazaqkontsert» memlekettik akademiialyq kontserttik uiymynyń ártisi N.Ónerbaiǵa, eńbek ardagerleri Q.Jaqypovqa, Ó.Ozǵanbaevqa, V.Redkokashinge jáne S.Shákiratqa, Almaty qalasy «Persona» halyqaralyq klinikalyq reprodýktologiia ortalyǵynyń basshysy V.Lokshinge, II dárejeli «Barys» ordeni Qazaqstannyń Germaniia Federativtik Respýblikasyndaǵy Tótenshe jáne Ókiletti elshisi N.Onjanovqa jáne eńbek ardageri J.Sháripovke, III dárejeli «Barys» ordeni Premer-Ministrdiń orynbasary T.Dúisenovaǵa, shahmattan álem chempiony B.Asaýbaevaǵa, Qyzylorda oblysynyń ákimi N.Nálibaevqa, Taraz qalalyq Qoǵamdyq keńesiniń tóraǵasy S.Seidázimovke tabystaldy.
Sonymen qatar bir top belgili ǵalym, mádeniet, bilim salasynyń qairatkerleri jáne óndiris ókilderi, memlekettik qyzmetkerler «Parasat» ordeniniń iegeri atandy. Olardyń qatarynda Almaty qalasy «Akýsherlik, ginekologiia jáne perinatologiia ǵylymi ortalyǵy» aktsionerlik qoǵamy Direktorlar keńesiniń tóraǵasy Z.Amanjolova, Qyzylorda oblysy Shieli aýdanyndaǵy «Arǵymaq» jaýapkershiligi shekteýli seriktestiginiń direktory O.Baidilda, «Qazaqstan avtorlar qoǵamy» respýblikalyq qoǵamdyq birlestiginiń bas direktory B.Esenáliev, Qazaq ulttyq óner ýniversitetiniń professory H.Qalilambekova, S.Seifýllin atyndaǵy Qaraǵandy oblystyq qazaq drama teatrynyń akteri K.Kemalov, M.Áýezov atyndaǵy ádebiet jáne óner institýtynyń bas direktory K.Matyjanov, Túrkistan oblysynyń ákimi D.Satybaldy, «Maǵjan» ádebi-kórkem jýrnalynyń bas redaktory J.Súleimenov, Shymkent qalasynyń ákimi Ǵ.Syzdyqbekov, M.Áýezov atyndaǵy Qazaq ulttyq drama teatrynyń aktrisasy D.Temirsultanova bar.
Ultaralyq beibitshiliktiń damýyna sińirgen eleýli eńbegi úshin «El birligi» ordenimen Qazaqstan halqy Assambleiasynyń múshesi S.Geroev, kúrdterdiń «Barbang» qaýymdastyǵynyń tóraǵasy A.Aliev, «Mitsva» qaýymdastyǵynyń tóraǵasy A.Baron jáne «Dinar-Elektromash» jaýapkershiligi shekteýli seriktestiginiń teń quryltaishysy S.Vishniak marapattaldy.
Elimizdiń damyp, órkendeýine eleýli eńbegi sińgen bir top azamat, sonyń ishinde Almaty qalasyndaǵy «Baldáýren» balalardy ońaltý ortalyǵy» KMK direktory Sh.Abesov, «Astana» halyqaralyq qarjy ortalyǵynyń basqarýshysy R.Bekturov, Astana qalalyq Jas kórermender teatrynyń aktrisasy S.Esliamova, skripkashy J.Serkebaeva, Qosshy qalasyndaǵy mektep-gimnaziianyń direktory D.Asqarova «Qurmet» ordenimen marapattaldy.
Budan bólek, ónerkásip, transport, qurylys, aýyl sharýashylyǵy jáne basqa da óndiris salalarynyń jumysshylary men eńbekkerleri II jáne III dárejeli «Eńbek dańqy» ordenin ielendi. «Qazaqstannyń eńbek sińirgen qairatkeri» qurmetti ataǵy ǵylym jáne mádeniettiń kórnekti ókilderine tabystaldy.
Qazaq ádebietiniń kórnekti ókilderi, aqyn-jazýshylar T.Medetbek, V.Mihailov jáne I.Saparbai «Qazaqstannyń halyq jazýshysy» ataǵyna ie boldy. «Qazaqstannyń halyq ártisi» qurmetti ataǵy elimizdiń kórnekti mádeniet qairatkerleri: teatr jáne kino akterleri K.Jumabekovke, L.Kádenge, O.Korjevaǵa, I.Lebsakqa, R.Mahpirovaǵa, G.Shyntemirge jáne Á.Ydyryshevqa, opera ánshileri M.Muhamedqyzy men J.Baspaqovaǵa, dirijer A.Muhitdinov pen kúishi S.Turysbekke, sondai-aq belgili ánshi M.Iliiasovaǵa berildi.
Sonymen qatar biyldan bastap qurmetti ataqtar qataryna «Qazaqstannyń eńbek sińirgen dárigeri» ataǵy qosyldy. «Ulttyq ǵylymi meditsinalyq ortalyǵy» aktsionerlik qoǵamynyń bas direktory A.Baigenjin, «Ulttyq ǵylymi onkologiia ortalyǵy» jaýapkershiligi shekteýli seriktestigi gematologiia ortalyǵynyń basshysy V.Kemaikin jáne Qaraǵandy oblystyq klinikalyq aýrýhanasynyń dárigeri B.Tshai jańa qurmetti ataqtyń alǵashqy iegerleri atandy.
Áskeri jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etýde, eldiń ulttyq qaýipsizdigi men qorǵanys qabiletin nyǵaitý kezinde kórsetken erligi úshin áskeri qyzmetshiler men quqyq qorǵaý organdary ókilderiniń bir toby I jáne II dárejeli «Dańq» ordenimen, II jáne III dárejeli «Aibyn» ordenimen, «Erligi úshin» jáne «Jaýyngerlik erligi úshin» medaldarymen marapattaldy. Atap aitqanda, sýǵa batyp bara jatqan adamdy qutqarǵany úshin R.Qoshqarbaev atyndaǵy III dárejeli «Aibyn» ordenimen Ulttyq ulannyń «Shyǵys» óńirlik qolbasshylyǵynyń aǵa jaýyngeri J.Permabek, «Erligi úshin» medalimen Pavlodar oblysy politsiiasynyń ýchaskelik aǵa inspektory E.Qoiken, Aqtóbe qalasynyń politsiia inspektory F.Nurmanov, Taldyqorǵan qalasynyń politsiia inspektory S.Serikqaliuly, jasóspirimdi órtten qutqarǵany úshin Atyraý qalasy politsiiasynyń ýchaskelik inspektory D.Qorǵanbaev nagradtaldy.
Jalpy biylǵy memlekettik nagradalardy taǵaiyndaýda qarapaiym jumysshylardyń mártebesin asyrýǵa, eńbek áýletteriniń qoǵamdaǵy abyroi-bedelin arttyrýǵa airyqsha mán berildi. Marapat ieleriniń qatarynda 450-den astam jumysshy, 137 pedagog, 80-nen asa ǵalym, 100-ge jýyq qutqarýshy men erikti bar.
Eńbek dinastiialaryn marapattaý dástúri biyl da jalǵasyn tapty. Bul joly muǵalimder, óndirisshiler, temirjolshylar áýletteri qurmetke bólendi.
