Osyǵan orai búgin atalǵan Quran kitabyn Qoja Ahmet Iasaýi kesenesine tapsyrý is-sharasy ótti. Saltanatty sharaǵa Túrkistan oblysynyń ákimi Darhan Satybaldy, Qazaqstan Musylmandary Dini Basqarmasynyń tóraǵasy, Bas múfti Naýryzbai qajy Taǵanuly, Kenesary hannyń urpaqtary qatysty.
– Túrkistan – san ǵasyr boiy túrki áleminiń mańyzdy ortalyǵy bolǵan. Búkil túrki dúniesine áigili oishyl, uly ustaz – Qoja Ahmet Iasaýi osy shaharda ómir súrgen.
Qazaqtyń 21 hany, sultandary men batyrlary jerlengen Qoja Ahmet Iasaýi kesenesine osyndai sirek jádigerdi ákelý – biz úshin úlken mártebe, maqtanysh. Bul – elimizdiń rýhyn kóteretin oqiǵa ekendigi anyq.
Qoja Ahmet Iasaýiden bastaý alatyn qazaq jerindegi rýhani sabaqtastyq qazirge deiin úzdiksiz jalǵasyp keledi. Biz qoǵamda qalyptasqan saiasi turaqtylyqty, adamdardyń bir-birine degen meiirimdiligin saqtap, keler urpaqqa amanat etip qaldyrýǵa tiispiz. Osy kitapty elimizge qaitarý úshin úlesin qosqan ulttyń janashyr azamattaryna óz alǵysymdy aitamyn, – dedi oblys ákimi.
Naýryzbai qajy Taǵanuly babamyzdan jetken qundy jádigerdi Qazaqstan musylmandary dini basqarmasy osy jyldyń maýsym aiynda qabyldap alǵanyn, Maral ishannyń tek dindar ǵana emes, qoǵam qairatkeri ekenine, atqarǵan ulaǵatty isterine toqtaldy.
– Qundy jádigerdiń Qoja Ahmet Iasaýi babamyzdyń kesenesine qoiylýy dástúrli dinimizdiń mártebesiniń artyp, halqymyzdyń sanasynyń izgilikke ózgerýine yqpal etedi degen oidamyz.
Maral ishan babamyz kim degende biz ony tek dindar ǵana emes, qoǵam qairatkeri, azattyq úshin kúresken tulǵa retinde tanýǵa tiispiz. Babamyz patsha úkimetiniń qazaq jerinde jasaǵan ádiletsizdikterine qarsy turyp, eldi jumyldyryp, ultty saqtaýda umytylmas ulaǵatty ister atqardy.
Maral ishannyń aǵartýshylyq qyzmeti bir tóbe. Biz de búgin qundy murany handar men biler, sultandar men rýhani ustazdardyń qiiametke deiingi máńgilik turaǵy bolǵan kieli mekenge alyp keldik. Álemniń ár qiyrynan Túrkistanǵa keletin kez-kelgen adam úshin bul taǵylymy mol, bereri kóp tarihi dúnie, – dedi Bas múfti.
Rýhani is-sharada ǵulama qarilar Quran hatym túsirdi. Bas múfti Quran kitapty «Áziret Sultan» memlekettik tarihi-mádeni mýzei-qoryǵynyń direktory Máýlen Sadyqbekovke tapsyryp, ol Úlken Aqsarai bólmesindegi arnaiy daiyndalǵan sórege ornatyldy.
Eki ǵasyr boiy qoldan qolǵa ótip, endi ǵana tarihi otanyna jetken kieli kitapta Kenesary hannyń móri bar.
