Maqtaaral aýdanynda fermerler Odaǵynyń konferensıasy ótti. Jıynǵa oblystyq fermerler Odaǵynyń tóraǵasy Júsip Sháripov, oblystyq aýyl sharýashylyǵy basqarmasynyń mamany Januzaq Áljanov, aýdandyq aýyl sharýashylyǵy bóliminiń basshysy Óser Myrzamdamov qatysty. Sondaı-aq, aýdandyq fermerler Odaǵynyń tóraǵasy Ydyrys Stamqulov májiliske tóraǵalyq etti.
Kún tártibinde aýdandyq fermerler Odaǵynyń esepti baıandamasy tyńdaldy.
Sonymen qatar, aýdandyq fermerler Odaǵynyń keńes músheleri men tóraǵasyn saılaý, aýdanǵa qarasty 2 kent pen 9 aýyldyq okrýgtiń fermerler Odaǵynyń tóraǵalaryn bekitý máseleleri qaraldy.
Jıyn barysynda jeltoqsan aıynda ótetin Túrkistan oblystyq fermerler Odaǵynyń konferensıasyna jáne «Qazaqstan fermerler Odaǵy» Respýblıkalyq qoǵamdyq birlestiginiń sezine qatysatyn delegat – fermerlerdiń kandıdatýralary anyqtaldy. Sondaı-aq, aýdandyq aýyl sharýashylyǵy bóliminiń basshysy Ó.Myrzamdamov aýyl sharýashylyǵyna beriletin sýbsıdıa, aýdandaǵy tuqym sharýashylyǵynyń barysy týraly sóz sóıledi.
