Respýblika kúni qarsańynda Jetisý oblysynyń aýyldyq eldi mekeninde taǵy bir jańa sport kesheni ashyldy. Alakól aýdanynyń Qabanbai aýylyndaǵy bul keshende 300-ge jýyq jasóspirim sportpen qamtylyp otyr. Osylaisha, oblys qurylǵannan beri 40 jańa sport nysany paidalanýǵa berildi, dep habarlaidy dalanews.kz.
Sport kesheneniń saltanatty ashylýyna qatysqan oblystyq dene shynyqtyrý jáne sport basqarmasy basshysynyń mindetin atqarýshy Erkebulan Dýanaev óńirde, ásirese aýyldyq jerde sport infraqurylymyn damytý memlekettik saiasattyń basym baǵyttarynyń biri ekenin atap ótti. Memleket basshysynyń buqaralyq sportty damytý jáne qoljetimdi sport infraqurylymyn qalyptastyrý jónindegi tapsyrmalaryn iske asyrý aiasynda óńirde atqarylyp jatqan júieli jumystarǵa toqtalyp, aýyl turǵyndaryn qýanyshtarymen quttyqtady.
Atap ótsek, sport kesheniniń qurylysy ótken jyldyń sáýirinde bastalǵan bolatyn. Nysannyń jalpy aýdany - 2076,2 sharshy metr. Nysanda tórt zal - oiyn zaly, boks, kúres jáne jattyǵý zaldary qarastyrylǵan. Munda sporttyń basketbol, voleibol, fýtbol, boks, dziýdo, ústel tennisi, jeńil atletika túrlerimen ainalysýǵa jaǵdai jasalǵan. Keshende bir mezgilde 80 bala sportpen shuǵyldana alady.
Jergilikti jattyqtyrýshylar bul nysan balalardyń sporttyq jattyǵýlarynyń aýqymyn keńeitýge múmkindik beretinin aitady.
- Búgin - aýyl balalary úshin erekshe qýanyshty kún. Endi zamanaýi sport kesheninde jattyǵýlardy qolaily jaǵdaida sapaly ótkize alamyz. Bul balalardyń sportpen turaqty ainalysýyna jáne óz qabiletterin shyńdaýyna jol ashady. Munda aýdandyq, oblystyq jáne respýblikalyq jarystarda jeńiske jetetin bolashaq chempiondar tárbielenetinine senimdimin, - dedi jeńil atletikadan jattyqtyrýshy Almat Imashev.
Qabanbai aýylynyń turǵyndary da jańa sport kesheniniń ashylǵanyna riza.
- Aýylymyzda osyndai sport kesheniniń ashylýyn kópten kúttik. Endi balalardyń sportpen ainalysýyna, bos ýaqytyn tiimdi ótkizýine múmkindik molaiady. Turaqty jattyǵýlar balalardyń densaýlyǵyn nyǵaityp, minezin shyńdaýǵa, tabandylyqqa, jaýapkershilikke, qiyndyqtardy eńserýge úiretedi. Aýylymyzda osyndai mańyzdy bastamalardyń júzege asyrylyp jatqanyna rizamyz, – deidi aýyl turǵyny Qanat Qojabekov.
Balalardyń ózderi de qýanyshtaryn jasyrmady.
- Men voleibol oinaǵandy jaqsy kóremin. Bolashaqta osy sport túrimen kásibi túrde ainalysqym keledi. Endi osy jańa zalda úlken jarystarǵa daiyndalýǵa bizde barlyq múmkindik jasalǵan, - deidi jas sportshy Amina Qabi.
- Meniń kúreske qatysyp júrgenime eki jyl boldy. Bizge osyndai jańa sport keshenin salyp bergenine qýanyshtymyz. Munda kúreske qajetti barlyq jabdyqtar bar. Osynda turaqty jattyǵyp, bolashaqta chempion bolamyz dep sendiremin – dedi Sanjar Berik.
Jalpy, búginde oblysta 1 146 sport nysany jumys isteidi. Atap ótsek, oblys halqynyń sport infraqurylymymen qamtamasyz etilý deńgeii 70,5%-ǵa jetip, respýblikalyq ortasha kórsetkishten asty. Osy jyldyń sońyna deiin bul kórsetkishti 71,4%-ǵa deiin jetkizý josparlanýda. Atap ótsek, oblys qurylǵannan beri óńirde 40 jańa sport nysany paidalanýǵa berilse, sonyń ishinde Alakól aýdanynda 7 sport nysany iske qosyldy, bul rette 2 kúres zaly jergilikti investorlardyń qarjysyna salynǵan. Jańa nysandardyń qatarynda Lepsi aýylyndaǵy 240 oryndy jataqhanasy bar 160 oryndy kópfýnktsionaldy sport keshenin atap ótýge bolady.
