Maqtaaralda babalar rýhyna as berildi
Eń aldymen 26-qazan kúni Atakent kentiniń «Alpamys batyr» stadionynda babalardy eske alýǵa arnalǵan fýtboldan Respýblikalyq jarystyń ashylý saltanaty ótti. Almaty, Aqtóbe oblystarynan jáne Túrkistan oblysynyń birneshe aýdanynan barlyǵy 10 fýtbol komandasy qatysqan doda eki kúnge sozyldy. Dál osy kúni «Dostyq» mádeniet úiinde jyrshylar men termeshilerdiń, dástúrli ánshilerdiń kontserttik baǵdarlamasy qoiyldy. Jinalǵan qalyń kórermenniń qanyn týlatyp, jelebesin qozdyrǵan dástúrli án keshinde elimizdiń túrli óńirlerinen kelgen ataqty jyrshylar men termeshiler ónerlerin ortaǵa saldy.
27-qazan kúni tańerteń Jetisai qalasynyń «Jeńis» alańyndaǵy qazaqtyń úsh bii eskertkishine gúl shoqtaryn qoiý rásimi ótti. Is-sharaǵa aýdan ákimi jáne Respýblikamyzdyń túrli óńirlerinen arnaiy kelgen qonaqtar qatysyp, babalar erligin eske alysty. Munan soń Atakent kentindegi «Dostyq» mádeniet úiinde «Maqtaaral – uly biler ulaǵatynyń qut mekeni» taqyrybymen konferentsiia uiymdastyryldy. Jiynda eń birinshi bolyp baiandama jasaǵan aýdan ákimi Baqyt Asanov Maqtaaral aýdany úsh júzdiń basyn qosqan kieli jer ǵana emes, otyzdan asa ultty baýyryna basqan qutty meken ekendigin atap ótti.
«Úsh bidiń el tynyshtyǵy jolyndaǵy eńbegi - Qazaq ultynyń baqytty keleshegi men Táýelsizdigi úshin jasaldy. Abyzdarymyzdyń qaýip-qaterdi elemei, bastaryn báigege tikken shynaiy otanshyl sezimi, yntymaq-birligi kúlli qazaq jurtyna yqpal etip, aýyzbirshilikke shaqyrdy. Búgingi baqytty ómirimiz osyndai babalarymyzdyń arqasynda ońai kelmegenin, úsh biimizdei ulylardy, elim dep eńiregen azamattardy keleshek urpaq eshqashan umytpaýy qajet dep bilemin. Kieli Maqtaaral aýdanynyń 90 jyldyǵy qarsańynda «Maqtaaral – uly biler ulaǵatynyń qut mekeni» is-sharalar legin ótkizýdiń mańyzy zor dep oilaimyn. Óitkeni, aq altyndy meken úsh júzdiń basyn qosqan kieli jer ǵana emes, otyzdan asa ultty baýyryna basyp otyrǵan qutty meken. Sondyqtan, jergilikti jerde ulttardyń tatýlyǵyn saqtaýda uly biler ulaǵatynyń róli zor. «Birlik bolsa – tirlik bolady» dep uly bilerimiz aitpaqshy, jańadan qurylǵan aýdan turǵyndaryn birlikke, yntymaqqa jumyldyrý – damýymyzdyń alǵy sharty bolmaq» - dedi Baqyt Násirhanuly.
Jiynda professor Begim Serikov qazaqtyń tarihy men Maqtaaral aýdanynyń tarihy jaily syr shertse, oblysymyzdyń jáne aýdanymyzdyń qurmetti azamaty Toiym Júnisov qara shańyraqtyń 90 jyldyǵy kúlli Myrzashól óńiri úshin tarihi data ekendigin eske saldy. Sonymen qatar, belgili aqyn, jazýshy Muhtar Quralov maqtaly ólkege arnaýyn oqyp, jyrdan shashý shashsa, aýdanymyzdyń qurmetti azamaty Qasymbek Hametov Myrzashóldegi okrýgter men eldi mekenderdiń qurylý tarihy týraly baiandady. Elbasymyzdyń synyptasy, aýdanymyzdyń qurmetti azamaty Raýza Tólemisova da maqtaly ólkege izgi tilegin arnap, 90 jyldyq mereitoidy joǵary deńgeide atap ótý kerektigin eske saldy.
Konferentsiiadan soń Atakenttegi «Áigerim» meiramhanasynda qazaq halqynyń Táýelsizdigi jolynda kúresken ata-babalarymyzǵa jáne Maqtaaral aýdanynyń damýy úshin aianbai eńbek etken azamattardyń rýhyna arnalyp as berildi. Sondai-aq, «Alpamys batyr» stadionynda 2 kúnge sozylǵan fýtbol dodasynyń jeńimpazdaryn marapattaý saltanaty ótip, is-sharalar legi qortyndylandy.
Maqtaaral aýdany ákiminiń baspasóz qyzmeti
