ەڭ الدىمەن 26-قازان كۇنى اتاكەنت كەنتىنىڭ «الپامىس باتىر» ستاديونىندا بابالاردى ەسكە الۋعا ارنالعان فۋتبولدان رەسپۋبليكالىق جارىستىڭ اشىلۋ سالتاناتى ءوتتى. الماتى، اقتوبە وبلىستارىنان جانە تۇركىستان وبلىسىنىڭ بىرنەشە اۋدانىنان بارلىعى 10 فۋتبول كومانداسى قاتىسقان دودا ەكى كۇنگە سوزىلدى. ءدال وسى كۇنى «دوستىق» مادەنيەت ۇيىندە جىرشىلار مەن تەرمەشىلەردىڭ، ءداستۇرلى انشىلەردىڭ كونسەرتتىك باعدارلاماسى قويىلدى. جينالعان قالىڭ كورەرمەننىڭ قانىن تۋلاتىپ، جەلەبەسىن قوزدىرعان ءداستۇرلى ءان كەشىندە ەلىمىزدىڭ ءتۇرلى وڭىرلەرىنەن كەلگەن اتاقتى جىرشىلار مەن تەرمەشىلەر ونەرلەرىن ورتاعا سالدى.
27-قازان كۇنى تاڭەرتەڭ جەتىساي قالاسىنىڭ «جەڭىس» الاڭىنداعى قازاقتىڭ ءۇش ءبيى ەسكەرتكىشىنە گۇل شوقتارىن قويۋ ءراسىمى ءوتتى. ءىس-شاراعا اۋدان اكىمى جانە رەسپۋبليكامىزدىڭ ءتۇرلى وڭىرلەرىنەن ارنايى كەلگەن قوناقتار قاتىسىپ، بابالار ەرلىگىن ەسكە الىستى. مۇنان سوڭ اتاكەنت كەنتىندەگى «دوستىق» مادەنيەت ۇيىندە «ماقتاارال – ۇلى بيلەر ۇلاعاتىنىڭ قۇت مەكەنى» تاقىرىبىمەن كونفەرەنسيا ۇيىمداستىرىلدى. جيىندا ەڭ ءبىرىنشى بولىپ بايانداما جاساعان اۋدان اكىمى باقىت اسانوۆ ماقتاارال اۋدانى ءۇش ءجۇزدىڭ باسىن قوسقان كيەلى جەر عانا ەمەس، وتىزدان اسا ۇلتتى باۋىرىنا باسقان قۇتتى مەكەن ەكەندىگىن اتاپ ءوتتى.
«ءۇش ءبيدىڭ ەل تىنىشتىعى جولىنداعى ەڭبەگى - قازاق ۇلتىنىڭ باقىتتى كەلەشەگى مەن تاۋەلسىزدىگى ءۇشىن جاسالدى. ابىزدارىمىزدىڭ قاۋىپ-قاتەردى ەلەمەي، باستارىن بايگەگە تىككەن شىنايى وتانشىل سەزىمى، ىنتىماق-بىرلىگى كۇللى قازاق جۇرتىنا ىقپال ەتىپ، اۋىزبىرشىلىككە شاقىردى. بۇگىنگى باقىتتى ءومىرىمىز وسىنداي بابالارىمىزدىڭ ارقاسىندا وڭاي كەلمەگەنىن، ءۇش بيىمىزدەي ۇلىلاردى، ەلىم دەپ ەڭىرەگەن ازاماتتاردى كەلەشەك ۇرپاق ەشقاشان ۇمىتپاۋى قاجەت دەپ بىلەمىن. كيەلى ماقتاارال اۋدانىنىڭ 90 جىلدىعى قارساڭىندا «ماقتاارال – ۇلى بيلەر ۇلاعاتىنىڭ قۇت مەكەنى» ءىس-شارالار لەگىن وتكىزۋدىڭ ماڭىزى زور دەپ ويلايمىن. ويتكەنى، اق التىندى مەكەن ءۇش ءجۇزدىڭ باسىن قوسقان كيەلى جەر عانا ەمەس، وتىزدان اسا ۇلتتى باۋىرىنا باسىپ وتىرعان قۇتتى مەكەن. سوندىقتان، جەرگىلىكتى جەردە ۇلتتاردىڭ تاتۋلىعىن ساقتاۋدا ۇلى بيلەر ۇلاعاتىنىڭ ءرولى زور. «بىرلىك بولسا – تىرلىك بولادى» دەپ ۇلى بيلەرىمىز ايتپاقشى، جاڭادان قۇرىلعان اۋدان تۇرعىندارىن بىرلىككە، ىنتىماققا جۇمىلدىرۋ – دامۋىمىزدىڭ العى شارتى بولماق» - دەدى باقىت ءناسىرحان ۇلى.
جيىندا پروفەسسور بەگىم سەرىكوۆ قازاقتىڭ تاريحى مەن ماقتاارال اۋدانىنىڭ تاريحى جايلى سىر شەرتسە، وبلىسىمىزدىڭ جانە اۋدانىمىزدىڭ قۇرمەتتى ازاماتى تويىم ءجۇنىسوۆ قارا شاڭىراقتىڭ 90 جىلدىعى كۇللى ءمىرزاشول ءوڭىرى ءۇشىن تاريحي داتا ەكەندىگىن ەسكە سالدى. سونىمەن قاتار، بەلگىلى اقىن، جازۋشى مۇحتار قۇرالوۆ ماقتالى ولكەگە ارناۋىن وقىپ، جىردان شاشۋ شاشسا، اۋدانىمىزدىڭ قۇرمەتتى ازاماتى قاسىمبەك حامەتوۆ مىرزاشولدەگى وكرۋگتەر مەن ەلدى مەكەندەردىڭ قۇرىلۋ تاريحى تۋرالى باياندادى. ەلباسىمىزدىڭ سىنىپتاسى، اۋدانىمىزدىڭ قۇرمەتتى ازاماتى راۋزا تولەمىسوۆا دا ماقتالى ولكەگە ىزگى تىلەگىن ارناپ، 90 جىلدىق مەرەيتويدى جوعارى دەڭگەيدە اتاپ ءوتۋ كەرەكتىگىن ەسكە سالدى.
كونفەرەنسيادان سوڭ اتاكەنتتەگى «ايگەرىم» مەيرامحاناسىندا قازاق حالقىنىڭ تاۋەلسىزدىگى جولىندا كۇرەسكەن اتا-بابالارىمىزعا جانە ماقتاارال اۋدانىنىڭ دامۋى ءۇشىن ايانباي ەڭبەك ەتكەن ازاماتتاردىڭ رۋحىنا ارنالىپ اس بەرىلدى. سونداي-اق، «الپامىس باتىر» ستاديونىندا 2 كۇنگە سوزىلعان فۋتبول دوداسىنىڭ جەڭىمپازدارىن ماراپاتتاۋ سالتاناتى ءوتىپ، ءىس-شارالار لەگى قورتىندىلاندى.
ماقتاارال اۋدانى اكىمىنىڭ باسپا ءسوز قىزمەتى
