Mańǵystaý týrizm kolledjiniń óndiristik oqý sheberi Nurai Elaman irimshikten balmuzdaq jasaidy, - dep habarlaidy mangystaumedia.kz saity.
Nurai Elamannyń aitýynsha, ulttyq dámnen balmuzdaq jasaý ideiasy tosynnan kelgen. - Aldymen qurt qosyp jasap kórdim, alaida, dámi sátsiz shyqty.
Keiin irimshikpen jasaǵan edim, dámi erekshe boldy. Bir kúnniń ishinde jasalǵan ulttyq dámdegi balmuzdaq janymdaǵy jandardyń kóńilinen shyqty.
Tipti, osy balmuzdaqpen byltyr Taraz qalasynda ótken halyqaralyq chempionatqa qatysyp, 2-oryn alǵan edik, - dedi óndiristik oqý sheberi Nurai Elaman.
Ulttyq dámnen jasalǵan erekshe balmuzdaq satylymda joq. Ideia avtory Nurai Elamannyń aitýynsha, qazir sertifikat alý, patentteý boiynsha jumystar júrgizilip jatyr. Qujattar rásimdelgen soń oblys kóleminde satylymǵa shyǵarýdy josparlap otyr.
Munan bólek óndiristik oqý sheberi ulttyq sýsyndar men balqaimaq, qurt qosylǵan túrli soýstardy ázirge tájiribeden ótkizip júr.
Bul soýstardy et nemese salatqa qosamyn. Mundai soýs arqyly ulttyń bas taǵamyn tolyqtyrýǵa bolady. Qazirgi tańda ulttyq mázirdi erekshe ádispen usyný suranysta ǵoi.
Al men daiyndap jatqan soýstar osy suranysty óteidi degen oidamyn. Meniń oiymsha, ulttyq brend aspazdyq ónerde de keńinen qoldanylsa, qazaq ashanasyn shetelge tanytýǵa múmkindik bar, - dedi Nurai Elaman.
Nurai Elaman - Mańǵystaý týrizm kolledjiniń túlegi. 3 jyldan beri óndiristik oqý sheberi bolyp ózi bitirgen kolledjde sabaq berýde. Stýdentteri de árdaiym izdeniste ekenin jasyrmady, sonyń nátijesinde respýblikalyq, halyqaralyq chempionattardan oljaly oralatynyn aitty.
