AQSh prezidenti Donald Tramptyń Fox News telearnasyna bergen suhbaty halyqaralyq deńgeide keń talqylanyp jatyr. Memleket basshysy Iranǵa qarsy áskeri áreketterdi kúsheitýi múmkin ekenin aityp, qatań málimdeme jasaǵan, dep habarlaidy dalanews.kz.
«Kelesi aptada olardyń jaǵdaiy shynymen aýyr bolady. Biz olardyń barlyq elektr stantsiialaryn joiamyz. Barlyq kópirlerin isten shyǵaramyz», – degen edi Tramp.
Ázirge bul málimdeme Vashingtonnyń kezekti qatań eskertýi retinde qabyldanyp otyr. Alaida sarapshylar mundai stsenarii júzege assa, AQSh-tyń Iranǵa qatysty qazirgi áskeri strategiiasy túbegeili ózgerýi múmkin ekenin aitady.
Nemistiń BILD basylymyna pikir bildirgen áskeri sarapshy Barri R. Pozenniń aitýynsha, osy ýaqytqa deiingi qaqtyǵys negizinen kelissózder men Irannyń óz ustanymyn saqtap qalýǵa baǵyttalǵan áreketter aiasynda órbidi.
«Eger Tramp Irannyń infraqurylymyn joiý týraly málimdemesin júzege asyrsa, jaǵdai túbegeili ózgeredi», – deidi sarapshy.
Pozenniń pikirinshe, mundai jaǵdaida Tegeran jaýap retinde Parsy shyǵanaǵynyń arǵy betindegi elderdiń infraqurylymyna shabýyl jasaýy múmkin. Áńgime Bahrein, Kýveit jáne Birikken Arab Ámirlikterindegi strategiialyq nysandar týraly bolyp otyr.
Sarapshynyń baǵalaýynsha, mundai stsenarii iske assa, álemdik munai baǵasy kúrt qymbattap, Izrail de qaqtyǵysqa qaita aralasýy yqtimal. Bul Taiaý Shyǵystaǵy shielenistiń burynǵydan da ýshyǵyp, keń aýqymdy áskeri qaqtyǵysqa ulasý qaýpin kúsheitedi.
