АҚШ президенті Дональд Трамптың Fox News телеарнасына берген сұхбаты халықаралық деңгейде кең талқыланып жатыр. Мемлекет басшысы Иранға қарсы әскери әрекеттерді күшейтуі мүмкін екенін айтып, қатаң мәлімдеме жасаған, деп хабарлайды dalanews.kz.
«Келесі аптада олардың жағдайы шынымен ауыр болады. Біз олардың барлық электр станцияларын жоямыз. Барлық көпірлерін істен шығарамыз», – деген еді Трамп.
Әзірге бұл мәлімдеме Вашингтонның кезекті қатаң ескертуі ретінде қабылданып отыр. Алайда сарапшылар мұндай сценарий жүзеге асса, АҚШ-тың Иранға қатысты қазіргі әскери стратегиясы түбегейлі өзгеруі мүмкін екенін айтады.
Немістің BILD басылымына пікір білдірген әскери сарапшы Барри Р. Позеннің айтуынша, осы уақытқа дейінгі қақтығыс негізінен келіссөздер мен Иранның өз ұстанымын сақтап қалуға бағытталған әрекеттер аясында өрбіді.
«Егер Трамп Иранның инфрақұрылымын жою туралы мәлімдемесін жүзеге асырса, жағдай түбегейлі өзгереді», – дейді сарапшы.
Позеннің пікірінше, мұндай жағдайда Тегеран жауап ретінде Парсы шығанағының арғы бетіндегі елдердің инфрақұрылымына шабуыл жасауы мүмкін. Әңгіме Бахрейн, Кувейт және Біріккен Араб Әмірліктеріндегі стратегиялық нысандар туралы болып отыр.
Сарапшының бағалауынша, мұндай сценарий іске асса, әлемдік мұнай бағасы күрт қымбаттап, Израиль де қақтығысқа қайта араласуы ықтимал. Бұл Таяу Шығыстағы шиеленістің бұрынғыдан да ушығып, кең ауқымды әскери қақтығысқа ұласу қаупін күшейтеді.
