Kókshetaýdaǵy eń iri jolaýshy tasymaldaýshy kompaniia qyzmetkerleri jalaqynyń keshiktirilýine bailanysty jumysqa shyǵýdan bas tartty. Sonyń saldarynan búgin tańerteń qalada qoǵamdyq kólik qozǵalysy qiyndap, birqatar baǵyttaǵy avtobýstar jelige shyqpaǵan, dep habarlaidy dalanews.kz.
Halyqstan málimetinshe, "Kókshetaý avtobýs parki" JShS-niń júrgizýshileri men kondýktorlary buǵan deiin kásiporyn basshylyǵyna ujymdyq ótinish joldaǵan. Olar 15 shildeniń sońyna deiin jalaqy tolyq tólenbese, 16 shilde kúni jumysqa shyqpaitynyn eskertken. Qyzmetkerler aitqan talaptaryn oryndap, búgin avtobýstardy baǵytqa shyǵarmady.
Ujymdyq úndeýde júrgizýshiler men kondýktorlar jalaqyny kóterý máselesin uzaq ýaqyttan beri kóterip kele jatqanyn atap ótken. Olardyń aitýynsha, qazirgi tabys kólemi otbasynyń kúndelikti qajettilikterin óteýge de jetpeidi.
Avtobýs parki basshylyǵy jalaqynyń keshigýin memleket tarapynan beriletin sýbsidiianyń ýaqytynda túspeýimen bailanystyrǵan.
Kókshetaý qalasynyń turǵyn úi-kommýnaldyq sharýashylyq, jolaýshylar kóligi jáne avtomobil joldary bólimi ujymǵa bergen jaýabynda tasymaldaýshylar aldyndaǵy sýbsidiia qaryzyn qarastyrylǵan qarjy kóleminde jaqyn arada óteý josparlanyp otyrǵanyn málimdedi.
"Tasymaldaýshylar aldyndaǵy mindettemelerdiń ýaqytyly oryndalýyn qamtamasyz etý jáne turaqty qalalyq baǵyttardyń jumysynda úzilis boldyrmaý máselesi turaqty baqylaýda. Qarjylandyrý máselelerin sheshý jáne qalalyq jolaýshylar tasymaly júiesiniń turaqty jumysyn qamtamasyz etý baǵytynda jumys júrgizilip jatyr", – delingen resmi jaýapta.
Alaida bul jaýap júrgizýshiler men kondýktorlardy qanaǵattandyrmaǵanǵa uqsaidy. Eger taraptar jaqyn arada ortaq kelisimge kele almasa, Kókshetaýdaǵy qoǵamdyq kólik daǵdarysy uzaqqa sozylýy múmkin.
