Biyl olar «Mondial du fromage – 2023» halyqaralyq irimshik baiqaýyna qatysyp, óz ónimderin usyndy. Erekshe atap ótetin jait, bul halyqaralyq konkýrsqa Qazaqstannan úmitkerler buryn sońdy qatyspaǵan.
Mańǵystaý oblysy ákimi Nurlan Noǵaevqa Túpqaraǵan aýdanyna jasaǵan jumys sapary kezinde irimshik óndirisiniń múmkindikteri týraly kásipkerler aityp berdi.
2020 jyldan bastap jumys isteitin «Jeti laq» fermasy Túpqaraǵan aýdanyndaǵy Aqshuqyr aýylynda ornalasqan. Kásipkerler pasterlengen eshki sútin, iogýrt, airan, súzbe, qaimaq jáne irimshiktiń 12 túrin shyǵarady.
– Biyl biz óndiristi damytýǵa baǵyttalǵan qaitarymsyz 5 mln teńge grant utyp aldyq. Sonymen qatar, «Aýyl amanaty» baǵdarlamalarynyń qatysýshylarymyz.
Aýyl sharýashylyǵy kásipornyn óz aqshańa damytý óte qiyn, osy turǵyda memleket aýyl sharýashylyǵy óndirýshilerine kóńil bólip, qoldaý kórsetip otyrǵany qýantady.
Biylǵy jyly biz úshin mańyzdy oqiǵa «Mondial du fromage – 2023» halyqaralyq irimshik baiqaýyna qatysý. Onda biz óz ónimderimizdi tanystyramyz. Aita ketý kerek, elimiz táýelsizdik alǵaly beri Qazaqstan alǵash ret álemdik irimshik jasaýshylar baiqaýyna óz ónimderin usynatyn bolady, – dedi irimshik daiyndaýshy Aleksandra Grigolova.
Óńir basshysy Nurlan Noǵaev kásiporynnyń jetistigi men Mańǵystaý irimshik óndirýshileriniń áleýeti zor ekenin atap ótti.
– Mańǵystaýda óndiriletin qazaqstandyq irimshikter jaqyn arada otandyq eksportty damytýdyń negizgi draiveri bola alady. Sizder halyqaralyq deńgeidegi baiqaýda elimizdi tanystyrý múmkindigine ie bolǵanyńyz qýantady. Sizderge sáttilik tilei otyra, kásipkerlerdiń bastamalaryn qoldaýǵa árqashan daiyn ekenimizdi aitqym keledi – dep atap ótti Nurlan Noǵaev.
Frantsýzdyq «Le Mondial du fromage» baiqaýy qyrkúiek aiynyń 10-12 aralyǵynda Týr qalasynda ótedi. Eýropada ótetin bul halyqaralyq is-shara sút ónimderin shyǵarýshy kásipkerlerdiń óz ónimderin usyna alatyn joǵary deńgeidegi alań bolyp tabylady.
