Gúl qoiý rásimi aiaqtalǵannan keiin «Máńgilik alaý» monýmenti janyna qurylǵan dala sahnasynda «Baqyt qonsyn elime» vokaldyq-horeografiialyq qoiylymy kórsetilip, ári qarai shara estrada ártisteriniń ónerimen jalǵasty.
Óz kezeginde oblys ákimi Nurlan Noǵaev barsha mańǵystaýlyqtardy merekemen quttyqtady.
– Sizderdi Uly Jeńis kúnimen shyn júrekten quttyqtaimyn! Búgin – batyr babalarymyzdy eske alatyn kún. El úshin, Otan úshin qaza bolǵan babalarymyzdyń rýhyna bas iemiz jáne aramyzda júrgen soǵys ardagerlerine zor qurmetpen alǵys bildiremiz.
Prezident Qasym-Jomart Toqaev «Aǵa býynnyń teńdessiz erligin qurmettep, zulmat soǵystyń zardaptaryn umytpaý – bizdiń qasterli boryshymyz!» dep aitqan bolatyn. Beibit kúnge jetkizgen batyrlarymyzǵa qurmetimiz qashanda joǵary. Mańǵystaý oblysynan Uly Otan soǵysyna 6 myńnan astam adam qatysty. Sonyń 4800-i soǵys alańynda erlikpen qaza tapty.
Búginde ortamyzda júrgen qadirli ardagerlerimizdi Jeńis merekesimen quttyqtai otyryp, zor densaýlyq, uzaq ǵumyr, otbasylaryna baq-bereke tileimin.
Elimizde beibitshiliktiń aspany árdaiym ashyq, eldigimiz eńseli, táýelsizdigimiz baiandy bolsyn! Sizderdiń erlikterińizdiń arqasynda Táýelsiz Qazaqstanymyzdyń kók bairaǵy kógimizde jelbirep, halqymyz tynyshtyqta ómir súrip jatyr,– dedi Nurlan Noǵaev.
Aita ketý kerek, alty ardagerdiń ekeýi Beineýde turady. Óz kezeginde Beineý aýdanynyń ákimi Beineýbek Ábilov ardagerler – Sáýirbai Bazarbaev pen Alýadin Oraqulyn merekelerimen quttyqtap, búgingi táýelsizdigimiz ben beibit kúnimiz úshin alǵys aityp, qurmet kórsetti.
