گۇل قويۋ ءراسىمى اياقتالعاننان كەيىن «ماڭگىلىك الاۋ» مونۋمەنتى جانىنا قۇرىلعان دالا ساحناسىندا «باقىت قونسىن ەلىمە» ۆوكالدىق-حورەوگرافيالىق قويىلىمى كورسەتىلىپ، ءارى قاراي شارا ەسترادا ارتىستەرىنىڭ ونەرىمەن جالعاستى.
ءوز كەزەگىندە وبلىس اكىمى نۇرلان نوعايەۆ بارشا ماڭعىستاۋلىقتاردى مەرەكەمەن قۇتتىقتادى.
– سىزدەردى ۇلى جەڭىس كۇنىمەن شىن جۇرەكتەن قۇتتىقتايمىن! بۇگىن – باتىر بابالارىمىزدى ەسكە الاتىن كۇن. ەل ءۇشىن، وتان ءۇشىن قازا بولعان بابالارىمىزدىڭ رۋحىنا باس يەمىز جانە ارامىزدا جۇرگەن سوعىس ارداگەرلەرىنە زور قۇرمەتپەن العىس بىلدىرەمىز.
پرەزيدەنت قاسىم-جومارت توقايەۆ «اعا بۋىننىڭ تەڭدەسسىز ەرلىگىن قۇرمەتتەپ، زۇلمات سوعىستىڭ زارداپتارىن ۇمىتپاۋ – ءبىزدىڭ قاستەرلى بورىشىمىز!» دەپ ايتقان بولاتىن. بەيبىت كۇنگە جەتكىزگەن باتىرلارىمىزعا قۇرمەتىمىز قاشاندا جوعارى. ماڭعىستاۋ وبلىسىنان ۇلى وتان سوعىسىنا 6 مىڭنان استام ادام قاتىستى. سونىڭ 4800ء-ى سوعىس الاڭىندا ەرلىكپەن قازا تاپتى.
بۇگىندە ورتامىزدا جۇرگەن ءقادىرلى ارداگەرلەرىمىزدى جەڭىس مەرەكەسىمەن قۇتتىقتاي وتىرىپ، زور دەنساۋلىق، ۇزاق عۇمىر، وتباسىلارىنا باق-بەرەكە تىلەيمىن.
ەلىمىزدە بەيبىتشىلىكتىڭ اسپانى ءاردايىم اشىق، ەلدىگىمىز ەڭسەلى، تاۋەلسىزدىگىمىز باياندى بولسىن! سىزدەردىڭ ەرلىكتەرىڭىزدىڭ ارقاسىندا تاۋەلسىز قازاقستانىمىزدىڭ كوك بايراعى كوگىمىزدە جەلبىرەپ، حالقىمىز تىنىشتىقتا ءومىر ءسۇرىپ جاتىر،– دەدى نۇرلان نوعايەۆ.
بۇگىندە وبلىستا 6 سوعىس ارداگەرى، 578 تىل ەڭبەككەرى تۇرادى. بيىل ولارمەن جەڭىستىڭ 77 جىلدىعىن بىرگە تويلاپ جاتىرمىز. ءوڭىر باسشىسى نۇرلان نوعايەۆ ءبىر توپ ازاماتتارمەن بىرگە اقتاۋ قالاسىندا تۇراتىن ارداگەرلەر اسان ايماعامبەتوۆ، ولگا زاريۆنياك، ۆاسيليي سالازكين جانە بيسەن بوقايەۆتى قۇتتىقتاپ، وتان ءۇشىن كۇرەسكەن ەرلىكتەرى ءۇشىن العىس ايتتى.
ايتا كەتۋ كەرەك، التى ارداگەردىڭ ەكەۋى بەينەۋدە تۇرادى. ءوز كەزەگىندە بەينەۋ اۋدانىنىڭ اكىمى بەينەۋبەك ءابىلوۆ ارداگەرلەر – ءساۋىرباي بازاربايەۆ پەن الۋادين وراقۇلىن مەرەكەلەرىمەن قۇتتىقتاپ، بۇگىنگى تاۋەلسىزدىگىمىز بەن بەيبىت كۇنىمىز ءۇشىن العىس ايتىپ، قۇرمەت كورسەتتى.
