Mańǵystaý oblysy Munaily aýdany Basqudyq aýylyndaǵy "Jibek joly" balabaqshasynda tárbieshi 1,5 jasar balanyń qolyn burap jaraqattaǵan. Ata-ananyń shaǵymynan keiin komissiia qurylyp, tekseris nátijesinde tárbieshi men kútýshi qyzmetinen bosatyldy, dep habarlaidy Dalanews.kz.
Tárbieshige QR ÁQBtK-niń 127-baby boiynsha 10 AEK (39 320 teńge) kóleminde aiyppul salyndy. Búldirshin basqa balabaqshaǵa aýystyryldy, al oqiǵaǵa qatysty materialdar quzyrly organdarǵa joldandy.
Eske salaiyq, buǵan deiin Mańǵystaý oblysynda ornalasqan jeke menshik balabaqshalardyń birinde tárbieshi bir jasar búldirshindi julqyp kótergennen, qolyn shyǵaryp alǵany týraly jazǵan edik.
Oqiǵadan keiin alǵashqy meditsinalyq kómek kórsetilmegen. Al ata-anasy balasynyń jaraqat alǵanyn úige kelgen soń ańǵarǵan.
Beinebaqylaý jazbalarynan tárbieshiniń qyzdy tynysh otyrǵan jerinen julqylap, oryndyqqa otyrǵyzǵany kórinedi. Alaida bala sol sátte jylamaǵan. Tek keshkisin úiinde qolynyń aýyratynyn aityp, ata-anasyna shaǵymdanǵan.
Buǵan qosa, beinejazbany saraptaý barysynda tárbieshiniń gigienalyq talaptardy óreskel buzǵany anyqtaldy. Ol bir qasyqpen birneshe balaǵa sorpa bergen, iaǵni ashana tazalyǵy saqtalmaǵan. Osy olqylyqtardan keiin tárbieshiniń kómekshisi de jumystan shettetildi.
Al balabaqsha basshysynyń aitýynsha, bul kezdeisoq bolǵan jait.
“Videoda tárbieshiniń tek balany kóterip, ornyna otyrǵyzǵany ǵana kórinedi. Quzyrly organdar da kadrlardy qarap shyqty, munda qasaqana zorlyq-zombylyq joq. Al tamaq berý máselesine kelsek, qyzmetker ydys-aiaqty jýýdy jeńildetý úshin osylai jasaǵan", - deidi Raýshan Aiapbergenova.
