Mańǵystaý oblysynyń Tobyqty jerinde Beket ata Myrzaǵululynyń 275 jyldyǵy men onyń rýhani ustazy Shopan atanyń rýhyna arnalǵan birqatar shara uiymdastyryldy. Eki kúnge jalǵasqan aýqymdy mereitoiǵa elimizdiń túkpir-túkpirinen jáne alys-jaqyn shetelden 10 myńnan astam qonaq jinaldy, dep habarlaidy Dalanews.kz.
Memleket basshysy Qasym-Jomart Toqaev mereitoiǵa quttyqtaý jedelhatyn joldap, Beket atanyń el rýhaniiatyndaǵy ornyna toqtaldy. Prezidenttiń quttyqtaýyn aimaq basshysy Nurdáýlet Qilybai oqyp berdi.
– Beket Myrzaǵululy – eline tutqa, jurtyna pana bolǵan tuǵyrly tulǵalarymyzdyń biri. Ol búkil ǵumyryn halqynyń dúnietanymyn baiytýǵa arnap, aǵartýshylyqpen ainalysty. Sanaly urpaq tárbieleýge airyqsha mán berip, meiirimdilik, janashyrlyq, tatýlyq, birlik, ádildik siiaqty barsha adamzatqa ortaq qundylyqtardy dáriptedi. Beket ata kúlli qazaqqa jáne baýyrlas elderge ǵulama oishyl, aty ańyzǵa ainalǵan áýlie retinde tanyldy. Búginde Mańǵystaý óńirindegi jerasty meshitteri qulshylyq orny, bilim ordasy ári erekshe sáýlet óneriniń týyndysy retinde tanymal. Meniń tapsyrmammen, Oǵylandydaǵy jerasty meshitin jáne osy aimaqtaǵy basqa da tarihi nysandardy IýNESKO-nyń Búkilálemdik muralar tizimine qosý úshin naqty jumys atqarylyp jatyr. Jurtyn izgilikke úndegen abyzdyń bolmysyn biiktete túsetin mádeni-rýhani qundylyqtar ultymyzdyń baǵa jetpes bailyǵy sanalady. Ony saqtap, urpaqqa miras etý – paryz. Barshańyzǵa amandyq, baq-bereke tileimin, – delingen jedelhatta.
Is-sharaǵa Qazaqstan Respýblikasy Parlamentiniń depýtattary, ziialy qaýym ókilderi, qoǵam jáne mádeniet qairatkerleri, jastar, sondai-aq ózge de qonaqtar qatysty.
Mereitoi aiasynda Shopan ata men Beket ata meshitine ziiarat jasaldy. Tai jarysy, alaman báige, qazaq kúresi, gir tasyn kóterý sekildi ulttyq sport túrlerinen saiystar uiymdastyryldy. Júzden astam kiiz úi tigilip, as berildi.
Sonymen qatar, shara mazmuny tereń rýhani-mádeni baǵdarlamalarmen jalǵasty. «Oitalqy» alańynda belgili tulǵalar eldik pen birlik, rýhani sabaqtastyq jaily paiymdarymen bólisse, «Mańǵystaý mashaiyqtyń basqan jeri» atty kontserttik baǵdarlama men «Áýlieler áýezi» dástúrli óner keshi kópshilikke rýhani áser syilady.
Barlyq mereitoilyq is-sharalar demeýshilerdiń qarjysy esebinen uiymdastyryldy.
