Mańǵystaýda kóktemniń jarshysy sanalatyn Amal merekesi keń kólemde toilanýda. Dástúrge sai merekelik shara óńirdiń eń biik núktesi sanalatyn qasietti oryndarynyń biri – «Adai ata – Otpan taý» tarihi-mádeni kesheninde uiymdastyryldy, dep habarlaidy Dalanews.kz
Mereke aiasynda «Amaldyń aq tańy» atty oblystyq sýretshiler pleneri uiymdastyrylyp, teatrlandyrylǵan kórinister qoiyldy. Sondai-aq, jergilikti óner ujymdarynyń gala-kontserti men 10-nan astam jyraýdyń qatysýymen jyr-terme keshi ótti.
Ázerbaijan, Túrkiia, Ózbekstan, Túrikmenstan elderinen arnaiy kelgen ónerpazdar án men jyrdan shashý shashty.
Dástúrge sai, Otpan taýdyń biiginde «Birlik oty» jaǵyldy. Biyl bul amanat Qosai ata urpaqtarynan Tázike ata urpaqtaryna tabystaldy.
Ulystyń uiytqysy bolǵan bul kúnde elimizdiń ár túkpiri men kórshi memleketterden kelgen aǵaiyn bir-birimen qaýyshyp, aq tilekterin arnady.
Merekege jinalǵan el aqsaqaldary Amal merekesiniń ata-babamyzdan jetken taǵylymdy dástúr ekenin jáne bul kúnniń – eldiń birligin bekemdep, tatýlyǵyn arttyratyn erekshe meiram ekendigin atap ótti.
Aita keteiik, Otpantaýda 14 naýryz kúni de merekelik sharalar jalǵasady. Bul kúni shashaq qulaqty tazy itterdiń jarysy, qunan báige, qazaqsha kúres, túie palýan saiysy men toǵyzqumalaqtan ashyq týrnir ótedi. Budan bólek, túrli mádeni jáne sporttyq is-sharalar uiymdastyrylmaq.
