16 tamyz kúni Mańǵystaýda ulttyq salt-dástúr men ádet-ǵurypty dáripteıtin «Aq Maıa Fest» atty shubat festıvali ótti. Tumsa tabıǵatyna talaıdy tamsyndyrǵan Aıraqty etegindegi festıválge 15 myńǵa jýyq halyq jınaldy. Onyń qatarynda Reseı, Fransıa, Qyrǵyzstan, Anglıa jáne Eýropanyń birneshe qalalarynan kelgen týrıster bar,- dep habarlaıdy Dalanews.kz
Halqymyzdyń ómir salty, dúnıetanymy tabıǵatpen úndes ekenin aıǵaqtaǵan festıválde qazaqtyń ulttyq sýsyny - shubatqa aıryqsha mán berildi. Tabıǵı sýsyn tek dámi úshin ǵana emes, densaýlyq pen dástúrdiń jarshysy retinde keńinen nasıhattaldy. Qonaqtar arnaıy daıyndalǵan «Aq maıa Lounge» jáne «Shubat Bar» aımaqtarynda shubattyń san alýan nusqalarynan dám tatty. Klasıkalyq qalpynan bólek, jıdek qosylǵan, jalbyz aralasqan jáne tipti muzben salqyndatylǵan shubattyń jańa túrleri usynyldy. Sonymen qatar, shubat negizinde jasalǵan «Shubat Mojito», «Desert Breeze», «White Steppe» tárizdi erekshe kokteılder de festıvál qonaqtaryn tánti etti.
«Aq maıa Lab» aımaǵynda shubat daıyndaý prosesin kózben kórip, tikeleı qatysý múmkindigi týdy. Kelýshilerge shubatty qalaı daıyndaý, qandaı qural-saımandar qoldanylatyny jáne onyń adam aǵzasyna tıgizetin paıdasy jaıynda tolyq aqparat berildi. Shaǵyn sheberlik saǵattary arqyly árbir qatysýshy ulttyq sýsynnyń daıyndalý qyr-syryn meńgere aldy.
Festıválde qazaqtyń ulttyq oıyndary da jıylǵan qaýym nazaryna usynyldy. «Steppe Games» aımaǵynda asyq atý, sadaq atý, gır kóterý sıaqty qyzyqty jarystar uıymdastyryldy. Al «Art-Yurta» men «Shubat Talks» bólimderinde kıiz úı ishinde leksıalar, stendaptar men paıdaly sheberlik sabaqtary ótti. Munda mádenıet, salt-dástúr, densaýlyq pen durys tamaqtaný týraly paıdaly aqparattar aıtyldy. Aýqymdy is-sharaǵa shubat óndiretin jergilikti fermerler de shaqyrylyp, ulttyq sýsynnyń daıyndalý jolymen bólisti.
Kesh baǵdarlamasynda qazaq estradasynyń tanymal juldyzdary Erke Esmahan, Raim, Luina, Amre jáne Yenlik sahnany ánge bólep, kórermenge merekelik kóńil-kúı syılady. Ár janrdy biriktirgen sahnalyq shoýda sımfonıalyq orkestr, dıdjeıler men rep oryndaýshylar óner kórsetip, mýzykalyq keshke zamanaýı lep qosty.
Keshtiń sharyqtaý sheginde Mańǵystaý aspanyn erekshe tańǵajaıyp kóriniske bólegen dron shoý ótti. Bir mezette 300-den astam dron kókke kóterilip, Qazaqstannyń týy, Mańǵystaý tabıǵatynyń kórinisteri, «Aqtaý - Túrki áleminiń mádenı astanasy» logotıpi men ulttyq oıý-órnekter beınelenip, tamashalaǵan jurtty tańdaı qaqtyrdy.
Shara sońynda 100-ge jýyq erikti men turǵyndar mereke ótken alańdy qoqystan tazartyp, qorshaǵan orta degen qurmetin kórsetti.
