Amal merekesi jyl ótken saiyn tanymal bolyp keledi. «Otpan Taý» tarihi-mádeni kesheninde Túrkiia, Ázerbaijan jáne Ózbekstannan kelgen qonaqtardy qosqanda 10 myńnan astam adamnyń qatysýymen Amal merekesi toilandy.
Qonaqtardy qarsy alyp, merekemen quttyqtaýǵa Mańǵystaý oblysynyń ákimi Nurlan Noǵaev, memleket jáne qoǵam qairatkeri Erlan Qoshanov, aitysker aqyn Amanjol Altai, Rinat Zaiytov, sondai-aq biyl merekeni uiymdastyrýshylardyń biri – «Tobysh – atanyń» urpaǵy Qalniiaz Ońdabaev keldi.
Óńir basshysy Nurlan Noǵaev 14 naýryz birlikti, meiirimdilikti, tatýlyq pen yntymaqty bildiretin kúnge ainalǵanyn atap ótti.
– Keńinen toilanatyn Amal merekesi halyq birliginiń simvolyna ainaldy. Búginde mańǵystaýlyqtar ǵana emes, alys-jaqyn shetelderden kelgen mártebeli meimandar da bizben birigýde. Túrkiiadan, Ázerbaijannan, Qyrǵyzstannan, Ózbekstannan kelgen ǵalymdar men kórnekti qairatkerler mádenietimizdiń alýan túrliligin atap ótti. Memleket basshysy Qasym-Jomart Toqaev atap ótkendei, el ejelden bul kúndi asyǵa kútedi, al birlik pen kelisimge shaqyratyn mereke halqymyzdyń dástúrli jaýapkershiliginiń jarqyn kórinisi, – dedi Nurlan Noǵaev.
Memleket jáne qoǵam qairatkeri Erlan Qoshanov ta barsha mańǵystaýlyqqa alǵys aityp, Amal merekesimen quttyqtady.
– Bul kúnderi eski renishterdi keshirý, ózgege meiirimdilik tanytý ádetke ainalǵan. Barshańyzǵa uzaq ǵumyr, amandyq, myzǵymas birlik, Táýelsizdigimiz máńgilik bolsyn dep tileimin, – dedi Erlan Qoshanov.
Mereke úshin kiiz úiler tigilip, barlyq qonaqqa dástúrli taǵamdar usynyldy. Jinalǵan halyq kontserttik baǵdarlamadan bólek, at báigesin, qazaq kúresi men ulttyq sporttyń basqa da túrlerin tamashalady. Sonymen qatar Amal merekesine orai halyqaralyq konferentsiia ótti. Konferentsiiaǵa Ázerbaijan, Túrkiia, Ózbekstannan kelgen ǵalym-tarihshylar belsendi qatysty.
Konferentsiia merekeni ótkizýdiń erekshelikterine negizdeldi, ǵalymdar túrki elderindegi Naýryz merekesin toilaý dástúrlerine toqtaldy.
Muhammed Fizýli atyndaǵy Ázerbaijan ulttyq ǵylym akademiiasy qoljazbalar institýtynyń ǵylymi qyzmetkeri, dotsent jáne professor Nezaket Memmedli Naýryz meiramy ázerbaijan halqynyń eń kóne, eń súiikti merekelerdiń biri ekenin aitty.
Onyń aitýynsha, Naýryz merekesiniń ereksheligi – janyp turǵan ottyń ústinen sekirý. Ottan sekirý arqyly barlyq jamandyq pen sátsizdik joiylady dep sengen. Sondai-aq olar merekede turǵyndar án aityp, halyq aspaptarynda oinaidy.
Túrkiiadaǵy «Bairam Veli» ýniversiteti jáne «Qajy Bektash Veli» zertteý ortalyǵynyń direktory Ahmet Tashǵyn Amal merekesi «qaidan shyqty, ne úshin oilap tabyldy?» degen suraqtar tóńireginde tolǵanǵanyn atap ótti.
– Merekeniń tarihyn zerttei kele, túrik pen qazaq mádenieti óte uqsas degen qorytyndy jasaýǵa bolady. Jahandaný úrdisi keibir ulttyq dástúrlerimizdi joiyp jatqandai. Bizdiń mindetimiz – barlyq ulttyq qundylyǵymyzdy jas urpaqqa jetkizý, – deidi professor Ahmet Tashǵyn.
Amal merekesi aiasynda «Otpan taý» tarihi-mádeni kesheninde Adai ata rýhyna quran baǵyshtaý rásimi ótti.
Saltanatty shara barysynda Tobysh ata urpaqtary Muńal ata urpaqtaryna dástúrli birlik alaýyn tabystady.
