Mańǵystaý oblysyndaǵy Beıneý jáne Mańǵystaý aýdandarynyń aýmaǵynda ornalasqan Tepke ýchaskesinen TZ-birinshi barlaý uńǵymasynan munaı burqaǵy atqylady. Alynǵan synamalar boıynsha munaı sapasy óte joǵary, jeńil, kúkirti joq, – dep habarlaıdy Dalanews.kz Mańǵystaý oblysy ákiminiń baspasóz qyzmetine silteme jasap . 

Bul  qýanyshty habardy oblys ákimi Serikbaı Trumovpen kezdesken «Merıdıan Petroleým» kompanıasynyń prezıdenti B.Qýandyqov jetkizdi. Onyń aıtýynsha Tepkedegi kenoryn – elimiz táýelsizdigin alǵaly 30 jylda  Mańǵystaý oblysynda ashylǵan alǵashqy eń iri ken orny bolmaq.

– 2018 jyly bastalǵan geologıalyq barlaý jumysy nátıjesin berdi. Alynǵan munaıdyń qysymy, debıti, gazdyq faktory jáne basqa da parametrleri boıynsha iri ken orny bolady dep boljap otyrmyz. Qazir kenornyndaǵy munaı qoryn anyqtaý jumystary júrip jatyr. Jańa kenorynnyń aınalasynda «Qaraqudyq», «Arystan» jáne «Komsomolskoe» kenoryndary ornalasqan, – dedi Merıdıan Petroleým kompanıasynyń prezıdenti B. Qýandyqov. 

Jańa kenornyna aty ańyzǵa aınalǵan geolog-barlaýshy, Mańǵystaýdaǵy barlyq kenornyn ashýǵa atsalysqan Halel Ózbekqalıevtyń esimi berildi.

Oblys ákimi S.Trumov atalǵan munaı ken ornynyń ashylýy óńirdiń áleýmettik-ekonomıkalyq damýyna keń serpin berip, jańa jumys oryndarynyń qurylýyna jol ashylatynyn aıtty. El ıgiligi úshin jasalyp jatqan jańa bastamaǵa sáttilik tiledi.