بۇل قۋانىشتى حاباردى وبلىس اكىمى سەرىكباي ترۇموۆپەن كەزدەسكەن «مەريديان پەترولەۋم» كومپانياسىنىڭ پرەزيدەنتى ب.قۋاندىقوۆ جەتكىزدى. ونىڭ ايتۋىنشا تەپكەدەگى كەنورىن – ەلىمىز تاۋەلسىزدىگىن العالى 30 جىلدا ماڭعىستاۋ وبلىسىندا اشىلعان العاشقى ەڭ ءىرى كەن ورنى بولماق.
– 2018 جىلى باستالعان گەولوگيالىق بارلاۋ جۇمىسى ناتيجەسىن بەردى. الىنعان مۇنايدىڭ قىسىمى، دەبيتى، گازدىق فاكتورى جانە باسقا دا پارامەترلەرى بويىنشا ءىرى كەن ورنى بولادى دەپ بولجاپ وتىرمىز. ءقازىر كەنورنىنداعى مۇناي قورىن انىقتاۋ جۇمىستارى ءجۇرىپ جاتىر. جاڭا كەنورىننىڭ اينالاسىندا «قاراقۇدىق»، «ارىستان» جانە «كومسومولسكوە» كەنورىندارى ورنالاسقان، – دەدى مەريديان پەترولەۋم كومپانياسىنىڭ پرەزيدەنتى ب. قۋاندىقوۆ.
جاڭا كەنورنىنا اتى اڭىزعا اينالعان گەولوگ-بارلاۋشى، ماڭعىستاۋداعى بارلىق كەنورنىن اشۋعا اتسالىسقان حالەل وزبەكقالييەۆتىڭ ەسىمى بەرىلدى.
وبلىس اكىمى س.ترۇموۆ اتالعان مۇناي كەن ورنىنىڭ اشىلۋى ءوڭىردىڭ الەۋمەتتىك-ەكونوميكالىق دامۋىنا كەڭ سەرپىن بەرىپ، جاڭا جۇمىس ورىندارىنىڭ قۇرىلۋىنا جول اشىلاتىنىن ايتتى. ەل يگىلىگى ءۇشىن جاسالىپ جاتقان جاڭا باستاماعا ساتتىلىك تىلەدى.
