Mańǵystaý oblysynda bilikti synaǵan 11 balanyń anasy, jańaózendik belsendi Jadyra Dosekeevaǵa qatysty sot úkimi shyqty, dep habarlaidy Dalanews.kz.
“Informbiýro” jańalyqtar qyzmetiniń málimetinshe, kópbalaly ana qylmystyq kodekstiń "telekommýnikatsiia jelilerin paidalana otyryp, áleýmettik alaýyzdyqty qozdyrý" baby boiynsha kináli dep tanylyp, úsh jyl shartty jazaǵa kesildi jáne qoǵamdyq jumystarǵa tartylatyn bolady. Sonymen qatar turǵynǵa úsh jyl boiy áleýmettik jelilerdi paidalanýǵa tyiym salyndy.
Sot jańaózendik turǵynnyń biyl sáýirde "TikTok" áleýmettik jelisinde jariialaǵan beinejazbasyn" áleýmettik jáne ulttyq alaýyzdyqty qozdyrýdy negizdeidi" dep baǵalaǵan. Belsendige qatysty qylmystyq is biyl maýsymda qozǵalǵan bolatyn. Sot barysynda prokýror onyń bas bostandyǵyn 4 jylǵa shekteý jazasyn taǵaiyndaýdy suraǵan. Al sot aiyptalýshynyń kámeletke tolmaǵan balalary baryn eskerip úsh jyl shartty jaza kesken. Sondai-aq, belsendi jazany óteý kezinde jyl saiyn 100 saǵatqa májbúrli eńbekke tartylady.
"Sottalýshy Jadyra Dosekeeva óziniń kinásin moiyndamai sottan aqtaý úkimin shyǵarýdy surady. Jadyra Dosekeevanyń kinási kýálerdiń jaýaptarymen, psihologiialyq-filologiialyq saraptama qorytyndysymen, istiń basqa da qujattarymen dáleldendi. Sot, Jadyra Dosekeeva-ǵa jaza taǵaiyndaý barysynda asyraýynda kishkentai balalarynyń bolýyn qylmystyq jaýapkershiligin jeńildetetin mán-jailar dep tanydy. Aýyrlatatyn mán-jailar anyqtalmady”, – delingen “Informbiýro” jańalyqtar qyzmetine joldaǵan habarlamada.
