ماڭعىستاۋ وبلىسىندا بيلىكتى سىناعان 11 بالانىڭ اناسى، جاڭاوزەندىك بەلسەندى  جادىرا دوسەكەيەۆاعا قاتىستى سوت ۇكىمى شىقتى، دەپ حابارلايدى Dalanews.kz.

“ينفورمبيۋرو” جاڭالىقتار قىزمەتىنىڭ مالىمەتىنشە، كوپبالالى انا قىلمىستىق كودەكستىڭ "تەلەكوممۋنيكاسيا جەلىلەرىن پايدالانا وتىرىپ، الەۋمەتتىك الاۋىزدىقتى قوزدىرۋ" بابى بويىنشا كىنالى دەپ تانىلىپ، ءۇش جىل شارتتى جازاعا كەسىلدى جانە قوعامدىق جۇمىستارعا تارتىلاتىن بولادى. سونىمەن قاتار تۇرعىنعا ءۇش جىل بويى الەۋمەتتىك جەلىلەردى پايدالانۋعا تىيىم سالىندى.

سوت جاڭاوزەندىك تۇرعىننىڭ بيىل ساۋىردە "TikTok" الەۋمەتتىك جەلىسىندە جاريالاعان بەينەجازباسىن" الەۋمەتتىك جانە ۇلتتىق الاۋىزدىقتى قوزدىرۋدى نەگىزدەيدى" دەپ باعالاعان. بەلسەندىگە قاتىستى قىلمىستىق ءىس بيىل ماۋسىمدا قوزعالعان بولاتىن. سوت بارىسىندا پروكۋرور ونىڭ باس بوستاندىعىن 4 جىلعا شەكتەۋ جازاسىن تاعايىنداۋدى سۇراعان. ال سوت ايىپتالۋشىنىڭ كامەلەتكە تولماعان بالالارى بارىن ەسكەرىپ ءۇش جىل شارتتى جازا كەسكەن. سونداي-اق، بەلسەندى جازانى وتەۋ كەزىندە جىل سايىن 100 ساعاتقا ءماجبۇرلى ەڭبەككە تارتىلادى.

"سوتتالۋشى جادىرا دوسەكەيەۆا ءوزىنىڭ كىناسىن مويىنداماي سوتتان اقتاۋ ۇكىمىن شىعارۋدى سۇرادى. جادىرا دوسەكەيەۆانىڭ كىناسى كۋالەردىڭ جاۋاپتارىمەن، پسيحولوگيالىق-فيلولوگيالىق ساراپتاما قورىتىندىسىمەن، ءىستىڭ باسقا دا قۇجاتتارىمەن دالەلدەندى. سوت، جادىرا دوسەكەيەۆا-عا جازا تاعايىنداۋ بارىسىندا اسىراۋىندا كىشكەنتاي بالالارىنىڭ بولۋىن قىلمىستىق جاۋاپكەرشىلىگىن جەڭىلدەتەتىن ءمان-جايلار دەپ تانىدى. اۋىرلاتاتىن ءمان-جايلار انىقتالمادى”، – دەلىنگەن “ينفورمبيۋرو” جاڭالىقتار قىزمەتىنە جولداعان حابارلامادا.