Memleket basshysy Qasym-Jomart Toqaev 2021 jyly Mańǵystaý oblysyna jumys sapary barysynda aýyz sý máselesine erekshe nazar aýdaryp, arnaiy tapsyrma bergen bolatyn.
Óńirdegi eldi mekenderdiń 20 paiyzynda aýyz sý jetispeýshiligi tirkelgen. Atalǵan máseleni sheshý úshin qabyldanǵan sharalar 12 eldi mekendi aýyz sýmen qamtamasyz etýge múmkindik berdi.
Memleket basshysynyń tapsyrmasy boiynsha Mańǵystaýdyń on eki aýylynda ortalyqtandyrylǵan sý qubyrlary (Beki, Basqudyq, Sam, Turysh, Noǵaity, Qyzylózen) júrgizilip, sýdy tazartýdyń keshendi bloktyq-modýldik qondyrǵylary (Tigen, Tasmuryn, 15 razezd, Bozdaq, Qiiaqty, Aqqudyq) ornatyldy.
Mamandardyń aitýynsha, oblysta aýyz sýdyń tapshylyǵy ásirese jazda baiqalady. Sý tapshylyǵy táýligine 52,7 myń tekshe metrdi quraidy, al óńirdiń damý deńgeiin eskere otyryp, 2030 jylǵa qarai bul kórsetkish táýligine 266,3 myń tekshe metrge, al tapshylyq – 109,5 myń tekshe metrge jetpek.
«Kaspii» tushytý zaýytynyń qýatyn táýligine 40 myń tekshe metrge deiin arttyrý kózdelýde.
Bul jobany iske asyrý úshin 2019-2022 jyldary respýblikalyq biýdjetten 12,1 mlrd teńge bólindi. Jobanyń 80%-y ázirlengen. Zaýyt 2023 jyldyń birinshi jartyjyldyǵynda paidalanýǵa berilýi tiis.
Sonymen qatar, Qarajanbas ken ornynda táýligine 17 myń tekshe metr sýdy tushytý zaýyty salynyp jatyr.
2023 jyly MAEK aýmaǵynda táýligine 24 myń tekshe metr sý tushytý qondyrǵylarynyń jáne Fort-Shevchenko qalasynda táýligine 5 myń tekshe metr sý tushytý zaýytynyń qurylysy bastalady. Bul jobalar 2023-2024 jyldary iske asyrylatyn bolady.
Aqtaýda qýattylyǵy táýligine 20 000 tekshe metr sý tushytý zaýytynyń qurylysy júrgizilýde.
Biyl birinshi jartyjyldyqta Aqtaýdaǵy aýyz sýdyń jalpy aǵyny táýligine bes myń tekshe metrmen tolyqtyrylady dep kútilýde.
Sondai-aq oblysta «Kaspii» tushytý zaýytynyń qýatyn 100 myń tekshe metrge jetkizý jónindegi joba iske asyrylmaq, sondai-aq Kendirli aýmaǵynda, Aqshuqyr, Shapaǵatov jáne Boranqul aýyldarynda tushytý qondyrǵylaryn salý josparlanyp otyr.
