مەملەكەت باسشىسى قاسىم-جومارت توقايەۆ 2021 جىلى ماڭعىستاۋ وبلىسىنا جۇمىس ساپارى بارىسىندا اۋىز سۋ ماسەلەسىنە ەرەكشە نازار اۋدارىپ، ارنايى تاپسىرما بەرگەن بولاتىن.
وڭىردەگى ەلدى مەكەندەردىڭ 20 پايىزىندا اۋىز سۋ جەتىسپەۋشىلىگى تىركەلگەن. اتالعان ماسەلەنى شەشۋ ءۇشىن قابىلدانعان شارالار 12 ەلدى مەكەندى اۋىز سۋمەن قامتاماسىز ەتۋگە مۇمكىندىك بەردى.
مەملەكەت باسشىسىنىڭ تاپسىرماسى بويىنشا ماڭعىستاۋدىڭ ون ەكى اۋىلىندا ورتالىقتاندىرىلعان سۋ قۇبىرلارى (بەكى، باسقۇدىق، سام، تۇرىش، نوعايتى، قىزىلوزەن) جۇرگىزىلىپ، سۋدى تازارتۋدىڭ كەشەندى بلوكتىق-مودۋلدىك قوندىرعىلارى (تيگەن، تاسمۇرىن، 15 رازەزد، بوزداق، قياقتى، اققۇدىق) ورناتىلدى.
مامانداردىڭ ايتۋىنشا، وبلىستا اۋىز سۋدىڭ تاپشىلىعى اسىرەسە جازدا بايقالادى. سۋ تاپشىلىعى تاۋلىگىنە 52،7 مىڭ تەكشە مەتردى قۇرايدى، ال ءوڭىردىڭ دامۋ دەڭگەيىن ەسكەرە وتىرىپ، 2030 جىلعا قاراي بۇل كورسەتكىش تاۋلىگىنە 266،3 مىڭ تەكشە مەترگە، ال تاپشىلىق – 109،5 مىڭ تەكشە مەترگە جەتپەك.
وڭىردە سۋ تاپشىلىعىن تۇبەگەيلى شەشۋ ماقساتىندا توعىز سۋ تۇشىتۋ زاۋىتىن سالۋ جوسپارلانۋدا.
«كاسپيي» تۇشىتۋ زاۋىتىنىڭ قۋاتىن تاۋلىگىنە 40 مىڭ تەكشە مەترگە دەيىن ارتتىرۋ كوزدەلۋدە.
بۇل جوبانى ىسكە اسىرۋ ءۇشىن 2019-2022 جىلدارى رەسپۋبليكالىق بيۋدجەتتەن 12،1 ملرد تەڭگە ءبولىندى. جوبانىڭ 80%-ى ازىرلەنگەن. زاۋىت 2023 جىلدىڭ ءبىرىنشى جارتىجىلدىعىندا پايدالانۋعا بەرىلۋى ءتيىس.
سونىمەن قاتار، قاراجانباس كەن ورنىندا تاۋلىگىنە 17 مىڭ تەكشە مەتر سۋدى تۇشىتۋ زاۋىتى سالىنىپ جاتىر.
2023 جىلى ماەك اۋماعىندا تاۋلىگىنە 24 مىڭ تەكشە مەتر سۋ تۇشىتۋ قوندىرعىلارىنىڭ جانە فورت-شيەۆچەنكو قالاسىندا تاۋلىگىنە 5 مىڭ تەكشە مەتر سۋ تۇشىتۋ زاۋىتىنىڭ قۇرىلىسى باستالادى. بۇل جوبالار 2023-2024 جىلدارى ىسكە اسىرىلاتىن بولادى.
اقتاۋدا قۋاتتىلىعى تاۋلىگىنە 20 000 تەكشە مەتر سۋ تۇشىتۋ زاۋىتىنىڭ قۇرىلىسى جۇرگىزىلۋدە.
بيىل ءبىرىنشى جارتىجىلدىقتا اقتاۋداعى اۋىز سۋدىڭ جالپى اعىنى تاۋلىگىنە بەس مىڭ تەكشە مەترمەن تولىقتىرىلادى دەپ كۇتىلۋدە.
سونداي-اق وبلىستا «كاسپيي» تۇشىتۋ زاۋىتىنىڭ قۋاتىن 100 مىڭ تەكشە مەترگە جەتكىزۋ جونىندەگى جوبا ىسكە اسىرىلماق، سونداي-اق كەندىرلى اۋماعىندا، اقشۇقىر، شاپاعاتوۆ جانە بورانقۇل اۋىلدارىندا تۇشىتۋ قوندىرعىلارىن سالۋ جوسپارلانىپ وتىر.
