Mańǵystaý oblysynda balyq túrlerin kóbeitý jáne akvasharýashylyq áleýetin keńeitý maqsatynda jańa jobalar qolǵa alynyp jatyr, dep habarlaidy Dalanews.kz.
Mańǵystaý oblysy ákiminiń orynbasary Asqar Qanybekov óńir basshysy Nurdáýlet Qilybaidyń tapsyrmasyna sáikes Balyq sharýashylyǵy basqarmasyna qarasty mekemelerdiń qyzmetimen jáne saladaǵy innovatsiialyq jobalardyń júzege asyrylý barysymen tanysty.
Mańǵystaý óńiri Kaspii teńizi jaǵalaýynda ornalasqandyqtan, balyq sharýashylyǵy bul aimaq úshin strategiialyq mańyzǵa ie. Degenmen, aimaqta negizinen bekire tuqymdas balyqtardy ósirý qalyptasqan. Balyq túrlerin kóbeitý jáne akvasharýashylyq áleýetin keńeitý maqsatynda jańa jobalar qolǵa alynyp jatyr.
Sonyń biri – Aqtaý qalasyndaǵy «Sultan Agro» JShS jylyjai kesheninde iske asyrylyp jatqan «Kaspii albyrt (Kaspiiskii losos) tuqymdas balyǵynyń analyq úiirin qalyptastyrý jáne inkýbatsiialyq tseh qurý» jobasy. QQEA qoldaýymen júzege asyp jatqan bul bastama óńirdegi akvaóndiristiń damýyna serpin berip, balyq sharýashylyǵy salasyn jańa deńgeige kóterýge baǵyttalǵan.
Ári qarai Asqar Qanybekov Mańǵystaý oblysy Balyq sharýashylyǵy basqarmasynyń «Janýarlar dúniesin qorǵaý jónindegi qyzmet» kommýnaldyq mekemesine bardy. Bul mekeme balyq sharýashylyǵy sý aidyndary men ýchaskeleriniń rezervtik qoryn qorǵaý, sondai-aq janýarlar dúniesin saqtaý jáne tiimdi paidalaný sharalaryn uiymdastyrýmen ainalysady. Olar ekologiialyq turaqtylyqty saqtaý baǵytynda túrli is-sharalardy júzege asyrýda.
Jumys sapary barysynda oblys ákiminiń orynbasary sala mamandarymen kezdesip, óńirdegi balyq sharýashylyǵyn damytýǵa qatysty ózekti máseleler men aldaǵy josparlardy talqylady.
