1 qyrkúiek – Bilim kúni qarsańynda Mańǵystaý oblysynda bes jańa mektep ashyldy. Onyń tórteýi Memleket basshysy Qasym-Jomart Toqaevtyń bastamasymen júzege asyrylǵan «Keleshek mektep» ulttyq jobasy aiasynda salynsa, bireýi demeýshilerdiń qoldaýymen boi kóterdi,- dep habarlaidy Dalanews.kz
Jańa bilim nysandarynyń biri – Beineý aýdany Sam aýylyndaǵy 300 oryndyq mektep. Ashylý rásimine oblys ákimi Nurdáýlet Qilybai, ardagerler, ustazdar men aýyl turǵyndary qatysty.
Saltanatty jiynda oblys ákimi jinalǵandardy bilim kúnimen quttyqtap, jańa mektepterdiń óńir úshin mańyzdylyǵyn atap ótti.
- Memleket basshysy bilim salasyn damytýǵa árqashan airyqsha kóńil bóledi. Búgin paidalanýǵa berilip otyrǵan jańa mektepter – osy qamqorlyqtyń naqty nátijesi. Prezidenttiń tapsyrmasymen salynǵan zamanaýi bilim ordalary shalǵaida jatqan aýyldarǵa da jetip, balalardyń sapaly bilim alýyna múmkindik berip otyr. Bul bilim ordasynda shákirtterdiń jan-jaqty damýyna, muǵalimderdiń shyǵarmashylyqpen eńbek etýine barlyq jaǵdai jasalǵan. Osy shańyraqtan túlep ushatyn túlekter elimizdiń damýyna úles qosatyn bilimdi de otanshyl azamat bolady dep senemin. Barshańyzdy bilim kúnimen quttyqtaimyn, jańa oqý jyly sátti ári tabysty bolsyn, – dedi Nurdáýlet Qilybai.
Sam aýylyndaǵy mektepte qazirgi tańda 151 oqýshy bilim alýda, 40 pedagog eńbek etedi. Mektepte 27 oqý kabineti, 18 qosymsha bólme, himiia, biologiia, informatika, robototehnika, STEM, óner jáne mýzyka synyptary qarastyrylǵan. Sonymen qatar logoped pen psiholog kabinetteri, sport jáne akt zaly, ashana, kitaphana, sheberhana, meditsinalyq bólme men murajai bar.
Budan bólek, jańa oqý jyly qarsańynda Aqtaý qalasynyń «Raýan» shaǵyn aýdanynda – 300 oryndyq, Munaily aýdanynyń Batyr aýylyndaǵy «Samal» shaǵyn aýdanynda – 1200 oryndyq, Beineý aýylynda – 600 oryndyq jáne Túpqaraǵan aýdanynyń Saiyn-Shapaǵatov aýylynda demeýshilerdiń qoldaýymen 1200 oryndyq mektep ashyldy. Bul nysandardyń iske qosylýy Munaily men Túpqaraǵan aýdandarynda úsh aýysymdy oqytýdy tolyqtai joiylyp, Beineý aýdanyndaǵy bir apatty mekteptiń máselesin sheship otyr.
Jalpy, jańa oqý jylynda Mańǵystaý oblysynda 157 mektep jumysyn bastady. Óńirde 213 myńnan astam oqýshy bilim alýda, olardyń 19 myńy alǵash ret mektep tabaldyryǵyn attady. Sonymen qatar oqý jylynyń alǵashqy toqsanynda taǵy bes jańa mektep paidalanýǵa berilmek.
