Almaty ákimdiginde Mihail Shaidorovty álem chempionatyndaǵy kúmis medalimen quttyqtady, dep habarlaidy Dalanews.kz
Mihail Shaidorov – jeke syrǵanaýda óner kórsetetin mánerlep syrǵanaýshy. Bostonda ótken álem chempionatynda ol kúmis medalǵa ie boldy. Almaty ákiminiń orynbasary Beibit Shahanov sportshyny quttyqtap, bul jetistiktiń tabandylyq pen maqsatkerliktiń jarqyn úlgisi ekenin atap ótti.
Kezdesý barysynda Beibit Shahanov Almaty ákimdiginiń atynan Mihail Shaidorovqa 2,5 million teńge kóleminde qarjylai sertifikat tabystady. Sondai-aq sportshyǵa demeýshilik qarajat esebinen Almatydan 2 bólmeli páter syiǵa tartyldy.
Beibit Shahanov onyń otandyq sportty damytýǵa jáne qalany halyqaralyq deńgeide tanytýǵa qosqan zor úlesin erekshe atap ótti.
«Siz qazaqstandyq mánerlep syrǵanaýdyń abyroiyn arttyryp qana qoimai, júzdegen jas sportshyny ózine senýge jáne alǵa umtylýǵa shabyt berdińiz. Erekshe alǵysty jattyqtyrýshyńyz Ásem Robertqyzy Qasanovaǵa aitqym keledi. Ol óz isine degen joǵary kásibiligimen, danalyǵy jáne shynaiy adaldyǵymen erekshelenedi. Qazaqstan Respýblikasynyń mánerlep syrǵanaý boiynsha bas bapkeri retinde ol sporttyń damýyna jáne muz aidynynda jańa juldyzdardyń qalyptasýyna úlken úles qosty», – dedi Beibit Shahanov.
Óz kezeginde Mihail Shaidorov qoldaý kórsetkeni úshin ákimdikke alǵys bildirdi.
«Men qala ákimdigine, almatylyqtarǵa qoldaý kórsetkeni úshin óte rizamyn. Bul meni shabyttandyryp, ári qarai jetistikke jetýge kúsh beredi. Bul meniń ǵana emes, búkil eldiń jeńisi, maǵan senip, osy jolda kómektesken kópshiliktiń eńbeginiń nátijesi», – dedi Mihail Shaidorov.
