Úkimet basshysy Asqar Mamın jumys sapary barysynda Shyǵys Qazaqstan oblysynyń Sıtýasıalyq ortalyǵyna baryp, óńirdegi sanıtarlyq-epıdemıologıalyq jaǵdaı men qabyldanyp jatqan sharalar týraly Shyǵys Qazaqstan oblysynyń ákimi Danıal Ahmetov, Óskemen qalasynyń ákimi Jaqsylyq Omar, Semeı qalasynyń ákimi Ermak Sálimov, Zaısan aýdanynyń ákimi S.Zaınýldın, Rıdder qalasynyń ákimi D.Gorkovoı, Altaı aýdanynyń ákimi Q.Baıǵonysov jáne densaýlyq saqtaý mınıstri A.Soı baıandady.
Qazirgi ýaqytta Qazaqstanda koronavırýs ınfeksıasymen aýyrǵandardyń 50%-y Shyǵys Qazaqstan oblysynda anyqtalǵan. Aýrýdy juqtyrǵandar sany boıynsha oblys qyzyl aımaqta ornalasqan. Ótken aptamen salystyrǵanda, óńirde syrqattanýshylyq 5,4 esege ósti, kún saıyn 350-den asa aýrý tirkelip otyr, jaǵdaıy aýyr naýqastardyń sany artty.
7 kún ishindegi R reprodýktıvti sany 1,25 quraıdy. Infeksıalyq tósek-oryndardyń júktemesi 23%, reanımasıalyq tósek-oryndar júktemesi 27,8% jetti. Aýrýdyń asa joǵary kórsetkishteri Óskemen jáne Semeı qalalarynda baıqalyp otyr.
Úkimet basshysy SHQO ákimdigine koronavırýs ınfeksıasynyń odan ári taralýyna jol bermeý, halyqqa sanıtarlyq talaptardy túsindirý jáne olardyń saqtalýyn baqylaý, alǵashqy medısınalyq-sanıtarlyq kómekti nyǵaıtý, medısınalyq mekemelerdi bilikti kadrlarmen tolyqtyrý úshin jaǵdaı jasaý boıynsha jumysty kúsheıtýdi tapsyrdy.
