ۇكىمەت باسشىسى اسقار مامين جۇمىس ساپارى بارىسىندا شىعىس قازاقستان وبلىسىنىڭ سيتۋاسيالىق ورتالىعىنا بارىپ، وڭىردەگى سانيتارلىق-ەپيدەميولوگيالىق جاعداي مەن قابىلدانىپ جاتقان شارالار تۋرالى شىعىس قازاقستان وبلىسىنىڭ اكىمى دانيال احمەتوۆ، وسكەمەن قالاسىنىڭ اكىمى جاقسىلىق ومار، سەمەي قالاسىنىڭ اكىمى ەرماك ءسالىموۆ، زايسان اۋدانىنىڭ اكىمى س.زاينۋلدين، ريددەر قالاسىنىڭ اكىمى د.گوركوۆوي، التاي اۋدانىنىڭ اكىمى ق.بايعونىسوۆ جانە دەنساۋلىق ساقتاۋ ءمينيسترى ا.سوي باياندادى.
قازىرگى ۋاقىتتا قازاقستاندا كوروناۆيرۋس ينفەكسياسىمەن اۋىرعانداردىڭ 50%-ى شىعىس قازاقستان وبلىسىندا انىقتالعان. اۋرۋدى جۇقتىرعاندار سانى بويىنشا وبلىس قىزىل ايماقتا ورنالاسقان. وتكەن اپتامەن سالىستىرعاندا، وڭىردە سىرقاتتانۋشىلىق 5،4 ەسەگە ءوستى، كۇن سايىن 350-دەن اسا اۋرۋ تىركەلىپ وتىر، جاعدايى اۋىر ناۋقاستاردىڭ سانى ارتتى.
7 كۇن ىشىندەگى R رەپرودۋكتيۆتى سانى 1،25 قۇرايدى. ينفەكسيالىق توسەك-ورىنداردىڭ جۇكتەمەسى 23%، رەانيماسيالىق توسەك-ورىندار جۇكتەمەسى 27،8% جەتتى. اۋرۋدىڭ اسا جوعارى كورسەتكىشتەرى وسكەمەن جانە سەمەي قالالارىندا بايقالىپ وتىر.
ۇكىمەت باسشىسى شقو اكىمدىگىنە كوروناۆيرۋس ينفەكسياسىنىڭ ودان ءارى تارالۋىنا جول بەرمەۋ، حالىققا سانيتارلىق تالاپتاردى ءتۇسىندىرۋ جانە ولاردىڭ ساقتالۋىن باقىلاۋ، العاشقى مەديسينالىق-سانيتارلىق كومەكتى نىعايتۋ، مەديسينالىق مەكەمەلەردى بىلىكتى كادرلارمەن تولىقتىرۋ ءۇشىن جاعداي جاساۋ بويىنشا جۇمىستى كۇشەيتۋدى تاپسىردى.
