Olar taqyr dalada jeýge qyltan tappai aram ólgen maldy kómip nemese órtep úlgirmei jatqandaryn aitady.
Dalada teńkiip jatqan ólekse jeterlik. Tipti, óristegi maldyń bári sý ishetin qudyqtyń ainalasy da qańqaǵa toly. Sharýalardyń endigi ýaiymy qoldaǵy tiri qalǵanyn saqtap qalý. Alaida, olardyń da jaǵdaiy máz emes ekenin aitady.
"Jemge toiyp alǵannan keiin jiliginde mai joq qoi. Tura almai jatyr", – deidi sharýalar.
Kóterem bieni aiaqqa turǵyzamyn dep áýre bolyp jatqan Nurbolat byltyrǵy kóktemnen beri qarai 27 bas jylqysynan airylypty. Jaiylymda shóp qýrap ketkeni azdai, jemniń de baǵasy sharyqtap tur eken.
"20 kelilik Qostanaidyń kebegin biz 2400 teńgeden Jańaózennen satyp alamyz. Osy kebek Ózbekstanda 1500 teńge turady. 1 jyl buryn 1000 teńge edi. Qoldan kóterip jiberdi. Jem-shópti Ózbekstanǵa, basqa jaqqa sattyrmasa eken deimiz", – deidi sharýa Nurbolat Temirbaev.
Bul aimaqqa úkimet tarapynan 2 milliard teńgege jýyq qarjy bólingen bolatyn. Sheneýnikter bul qarajattyń 1 milliard 100 millionyn igerdik dep otyr. Iaǵni, árbir analyq bas úshin 9800 teńgeden tólengen. Qolyna túskendi jylqysyna berip otyrǵan Doǵdyrbai 31 biesi úshin tiesili tólemdi alypty.
"Ol aqshaǵa keshe 150 qapshyq jem aldym. Boldy. Kúnine 2 qapshyqtan jeidi. 30 kúnde taýysady. Ol ne bolady? Amal joqtyqtan mynadai qarbyz alamyz, qaýyn alamyz. Bul da ánsheiin kelmeidi, aqshaǵa alasyń. Bul Mańǵystaýda bolmaǵan jut. Kózimdi ashqaly malda kele jatyrmyn. Mundaidy kórgen joqpyn", – deidi ol.
Sýdyń tunyǵyn ishetin jylqylar alystaǵy qudyqqa jete almaityn kúige túsip, aýyl irgesinde jinalǵan káriz sýyn iship júr eken. Sharýalar sońǵy 2 jylda árbir 10 bieniń jartysy qulyndasa qýanamyz deidi. Maly óspegen soń keibir azamattar amalsyz basqa qonys izdeýge májbúr.
"Maldyń qamy úshin kóship jatqan jigitter jetedi. Biyl ásirese kóp. Aqtóbe jaǵyna kóship jatyr, Oral jaǵyna kóship jatyr. Ózi kóshpese sol jaqta aqsha tólep baqtyratyn qylyp, malyn kóshirip jatyr", – deidi sharýa Saǵat Qosov.
Óristegi tórt túliginiń tileýin tilegenderdiń bar úmiti sońǵy ýaqytta jii talqylanyp jatqan jasandy jańbyr jaýǵyzý ádisi.
Álemniń kóp elinde qoldanylyp júrgen mundai qurylǵyny jaldaý quny 500 million teńge shamasynda. Sheneýnikter "bul shyǵyndy tóleitin demeýshiler tabylyp tur" deidi.
Tek kelisimge qol qoisa boldy, qysta qardy, jazda jańbyrdy jaýdyrmaqshy eken.
"Olar "200 shaqyrym radiýste" deidi. Iaǵni, Mańǵystaý oblysyn tolyqtai qamtidy degen sóz. Osy jerden Beineý aýdany 500 shaqyrym. Demek túgel oblysty qamtidy. Olardyń aitýy "naqty 2 kún jaýdyramyz, siz aityp otyrǵandai toqtamai qalady" degen bolmaidy dep ýádesin berip otyr", – deidi Mańǵystaý oblysy aýylsharýashylyǵy basqarmasynyń basshysy Serik Qaldyǵul.
Biraq bul bastamadan biyl oryndalmaýy múmkin. Oblystaǵy jaýapty mamandar ol úshin qajetti qarajatty taýyp, tólegen kúnniń ózinde qurylǵyny qurý úshin 4 aidai ýaqyt kerek eken. Sondyqtan erte degenniń ózinde aldaǵy kóktemsiz jasandy jańbyrdy kútýdiń qajeti shamaly. Sharýalarǵa sol kóktemge jetý ýaiym bolyp otyr.
https://www.youtube.com/watch?v=1NmeoCo4Sh8&list=PL_blKZJ1z0cCjIX34-SJRAdE1RZHtm9z8&index=9
