Qarjylyq monitoring agenttigi shamamen 140 myń azamatty meditsinalyq uiymdarǵa jalǵan tirkeý jáne kórsetilmegen meditsinalyq qyzmetter týraly jalǵan málimet engizý arqyly Áleýmettik meditsinalyq saqtandyrý qorynan zańsyz qarjy alý shemalaryn anyqtady, dep habarlaidy dalanews.kz.
Osy derekter boiynsha 36 qylmystyq is tergelip jatyr. Aldyn ala esep boiynsha memleketke keltirilgen shyǵyn 3,5 mlrd teńgeden asady.
Máselen, Túrkistan oblysynda Jetisai kópsalaly aýdandyq aýrýhanasynyń laýazymdy tulǵalaryna qatysty tergeý júrgizilip jatyr. Tergeý málimetine sáikes mindetti áleýmettik meditsinalyq saqtandyrý (MÁMS) aiasynda bólingen qarajat is júzinde eshqandai qyzmet kórsetpegen ári taýar jetkizbegen 20-dan asa jeke kásipkerdiń esepshottaryna aýdarylǵan.
Kásipkerler meditsinalyq mekememen eshqandai shart jasaspaǵan. Al olardyń deregi aqshany zańsyz shyǵaryp, keiin qolma-qol aqshaǵa ainaldyrý úshin paidalanylǵan. Memleketke keltirilgen shyǵyn 501 mln teńgeden asty. Eki kúdikti qamaýǵa alyndy.
Astanada Forte Clinic JShS jeke klinikasynyń basshysy Áleýmettik meditsinalyq saqtandyrý qorynan zańsyz qarjy alý shemasyn uiymdastyrǵany úshin 5 jylǵa bas bostandyǵynan aiyryldy. Al onyń sybailasy - Densaýlyq saqtaýdy damytýdyń ulttyq ǵylymi ortalyǵynyń qyzmetkeri azamattardy tirkeýge qatysty ótinimderdi zańsyz maquldaǵany úshin 3 jylǵa sottaldy. Qylmystyq shema nátijesinde klinikaǵa 15 myńnan asa azamat zańsyz tirkelgen. Sonymen qatar, Damu Med aqparattyq júiesi arqyly 79 mln teńgeniń jalǵan meditsinalyq qyzmeti rásimdelgen.
Almaty oblysynda Mydental.kz JShS men Stomatologiia Dr. Nurzhanova JShS klinikalarynyń basshysy stomatologiialyq qyzmet kórsetý kezinde alaiaqtyq jasaǵany úshin múlki tárkilenip, 4 jylǵa bas bostandyǵynan aiyryldy.
Shyn máninde patsientterge eshqandai qyzmet kórsetilmegen. Al qujattardy rásimdeý úshin dárigerlerdiń jazbalary men kámeletke tolmaǵan patsientterdiń jeke deregi paidalanylǵan. Nátijesinde jalǵan meditsinalyq qyzmet kórsetýdiń 4,5 myńnan asa deregi anyqtalyp, memleketke 66 mln teńge shyǵyn kelgen.
