Máselen, Saryaǵash aýdany Aqjar bastaýysh partiia uiymyna eldi meken turǵyndarynan tozyǵy jetken elektr symdaryn jańartý jóninde ótinish kelip tústi. Aýdandyq máslihat depýtaty Sh.Ibragimov máseleni aýdandyq máslihattyń sessiiasynda kóterip, nátijesinde aýdandyq biýdjet esebinen tiisti qarjy bólingen. 20 mamyr kúni T.Orynbaev kóshesiniń elektr symdary men jaryq shamdary aýystyrylyp, turǵyndar partiia filialyna alǵystaryn bildirdi.
Infraqurylym máselesi Túlkibas aýdanynda da kóterildi. Qabanbai aýylynyń turǵyndary respýblikalyq mańyzy bar joldyń astynda ornalasqan mal ótkeli jáne sý ótkelderin ashý týraly shaǵymyn jetkizgen. Partiia filialy jaýapty mekemelermen bailanysyp, nátijesinde talap-tilek oryndaldy.
Al Tólebi aýdanynda jalǵyzbasty jáne qaraýsyz qalǵan Kielitas eldi mekeniniń turǵynyna meditsinalyq kómek kórsetilgen. A.Golovkonyń eki kózi de kórý múmkindiginen aiyrylǵan. Aýdandyq máslihat depýtaty D.Omarov óz qarajaty esebinen 3 ret aimaqtyq diagnostikaǵa teksertýge yqpal etti.
Tiisti múgedektik qujaty bolmaýyna bailanysty memlekettik járdemaqyny qalys qalǵan. Depýtat qujattandyrý máselesine de aralasyp, ótinish iesi I toptaǵy múmkindigi shekteýli azamat retinde tiisti járdemaqyǵa qol jetkizdi.
Munan ózge partiia tarapynan jergilikti turǵyndardy turaqty jumyspen qamtý, aqyly qoǵamdyq jumysqa ornalastyrý, zańgerlik keńes, azyq-túlik úlestirý, meditsinalyq jáne áleýmettik kómekter uiymdastyrylyp keledi. Partiia filialdaryna kelip túsetin ótinishterdiń áralýandyǵyna bailanysty olar sheshý kezeńderi men deńgeige bólinedi. Biri aýdandyq deńgeide oryndalsa, endi biri oblystyq tipti respýblikalyq qoldaýdy qajet etedi. Atap óterlik, jyl basynan beri partiia filialdarynda 6900-den astam ótinish tirkelip, 3100-deii ońtaily sheshilgen. Qalǵan 3800-ge jýyǵyna zań aiasynda túsindirmeler júrgizilgen. 60-tai talap-tilektiń áli qaralý merzimi bar.
