“Ákejan myrza, qýǵyndaǵy Ermek Narymbaevpen saýaldasyp, men týraly tym aýyr sóz aitqan eken. “Ámirjannyń saiasi karerasy máresine jetti...” degen sarynda pikir bildiripti. Muny estigen jýrnalister tynysh jatsyn ba?
Qajygeldin synady dep, mort synatyn jaiym joq. Saiasatker úshin bul qalypty qubylys, úirenshikti jait.
Óz basym Ákejan aǵany osy eldiń betke ustar azamaty dep bilemin. Premer qyzmetinde asa aýyr ekonomikalyq reformalardy júzege asyra bildi. Bilik úshin Qajygeldinniń Qazaqstanda júrgeni tiimdi edi”, – deidi Qosanov.
Saiasatker saiasi mansap qýýdy maqsat tutpaǵanyn aitady. Prezident sailaýynan keiin halyqty alańǵa súirep shyqsa, Jeltoqsan men Jańaózendegidei qantógis bolaryn taǵy bir márte qaitalaǵan eken.
“Aiaq-qolyna kisen salynǵan meni dáp sol arada abaqtyǵa áketer edi. Meniń kesirimnen kóshedegi jazyqsyz jurt japa sheger edi. Saiasi kareramdy oilaǵan bolsam, osyndai oisyz áreketke barar edim. Biraq men bul joldan bas tarttym”, – deidi ol.
Onyń pikirinshe prezident sailaýynda jeńiske jetýine oppozitsiianyń óz ishindegi alaýyzdyq kedergi keltirgen. Eger eldegi oppozitsiia bas qurap, ortaq kandidat usynǵan bolsa, munymen bilik te sanasar edi ustanymda.
Qosanov qazir ózin oppozitsiia dep ataityn topqa ókpesi qara qazandai.
“Men sailaýǵa túskende janymda Qajygeldin de, Erǵalieva da, Bapi da, Mamai da, Bergei de, Rysbek Sársenbai da tipti Áblázov te bolǵan joq. Bulardyń birde-bireýi qol ushyn sozýdy qajet dep tappady. Sailaý qarsańynda, aldyma kelip: “Ámirjan biz senimen birgemiz!” deýge dáti jetpedi.
Kerisinshe: “Aldymen seniń áýseleńdi kóreiik, kúresip kór. Biz kórermen bola turaiyq” degen syńai tanytty.
Ashyǵyn aitqanda, osylardyń kesirinen sailaýshylardyń daýysynan aiyryldym. Bular belsendilik tanytsa, qysylǵan shaqta janymnan tabylsa myna júiege narazy júzdegen, myńdaǵan adamnyń nazaryn aýdarar edik. Ózin oppozitsiia sanaityn azamattar sózbuidaǵa salmai, kerek kezde Qosanovtyń tóńiregine toptassa, jaǵdai múlde basqasha órbir edi”, – deidi ol.
Saiasatkerdi ashyq túrde qoldaýǵa dármeni jetpegen azamattardyń, Qosanovty synaityn moraldyq quqy joq!
Sói degen saiasatker dál sailaý qarsańynda bir top qazaqstandyq belsendini Parijge aldyryp, májilis ótkizgen Qajygeldinniń áreketin synaǵan eken. Onyń oiynsha, Qazaqstanda ózgeris jasaýǵa múddeli bolsa eks-premer jol-pulǵa jumsalǵan qyrýar aqshany Qosanovtyń sailaýaldy naýqanyna baǵyttar edi.
“Ákejan myrza prezident bolǵysy kele me? Endeshe ne turys! Nar táýekel! Demokratiialyq qundylyqtardy ulyqtaityn kez-kelgen adamnyń kandidatýrasyn qoldaýǵa ázirmin”, – deidi ol.
Saiasatker budan bólek Mamai men Júkeevti, Rysbek Sársenbai men Baltash Tursymbaidy da bir-bir túirep ótken.
“Sizder aityp júrgen Tólegen Júkeev pen Janbolat Mamai sailaý kezinde jym bop otyrdy! Jumǵan aýzyn ashýǵa jaramady. Jym-jylas joǵalyp ketti. Endi kep “Qosanov satqyn!” degen syńaida sóilep júr. Meniń atymdy paidalanyp, jarnamasyn jasaýda.
Tólegen myrza (Júkeevti aitady, red.) men prezident sailaýyna túskende siz qaida boldyńyz, sizdiń jaqtastaryńyz qaida júrdi? Anyǵy, meni qaralaý, maǵan kúie jaǵýmen qyzý ainalystyńyzdar! Sonyń kesirinen qanshama sailaýshy Qosanovtan teris ainaldy. Meni qoldaýdyń ornyna, maǵan qarsy shaptyńyzdar”, – degen eken saiasatker.
Budan keiin Qosanov atalǵan azamattardan sekem alyp alǵan. Biliktiń soiylyn soǵýy múmkin degen boljam aitady. Pikirinshe, bilik olardyń urtyn mailaýy ǵajap emes.
“Shetelde júrgen, kofesin soraptap qoiyp, eldi mitingige shyǵýǵa úgitteitin psevdo-oppozitsiiaǵa aitarym, aitýǵa ońai!
Erteńgi kúni jazyqsyz azamattar jábir kórse, bular ara túsýge de jaramaidy. Batyr bolsańdar, elge oralyńdar! Ómirin myna júiemen kúreske arnaǵan, elden bezbegen, el ishinde júrgen, demokratiialyq qundylyqtar úshin qasyq qany qalǵansha aiqasýǵa ázir Qosanovtyń kebin kiip kórińder!”, – dep qorytyndalapty sóziniń sońyn Ámirjan myrza.
Ázirlegen, Dýman BYQAI
