Malaiziianyń úkimet basshysy Anvar Ibragim 18-den asqan barlyq el azamattaryna kómek aqsha taratynyn jariialap, janar-jaǵarmai baǵasyn túsirýge de ýáde berdi. Salyq pen tarifterdi aiamai kóteremin dep halyq narazalyǵyna ushyraǵan mundaǵy bilik búginderi jan-jaǵyna qarmanyp, tyǵyryqtan shyǵar amaldar izdeýde, dep habarlaidy Dalanews.kz.
Osy senbide Kýala-Lýmpýrda úkimettiń otstavkaǵa ketýin talap etetin miting ótpek. Budan aldyn ala habardar úkimet sársenbide 18 jastan asqan barlyq Malaiziia azamattary 31 tamyzdan bastap 100 ringgit (760 bat nemese 23,70 dollar/12 800 teńge) kóleminde bir rettik tólem ala bastaitynyn málimdedi, dep jazady Bangkokpost.com.
Tikelei efirde Anvar Ibragim 2025 jylǵy aqshalai kómektiń jalpy somasy 15 milliard ringgitti quraitynyn, bul soma aldynda bólingen 13 milliardtan áldeqaida kóp ekenin de basa atap ótti.
Anvar ákimshiligi biylǵy jyly kirister men ónimdilikti arttyrý boiynsha birqatar sharalar qabyldady, sonyń ishinde eń tómengi jalaqy kólemin arttyrý, iri tutynýshylar úshin elektr energiiasynyń tarifterin ósirý jáne saýda-sattyq pen qyzmet kórsetý salyǵyn da kóbeitý qamtylady. Premer-ministr bul sharalar, negizinen, iri biznes pen aýqatty adamdarǵa baǵyttalǵanyn aitady, degenmen sarapshylar qaýymy bul qymbatshylyq tutynýshylardyń, sonyń ishinde tabysy tómen jáne ortasha toptaǵy adamdardyń moinyna qamyt bolyp ilinetinin eskertýde.
