Abai oblysynyń ákimi Berik Ýáli Besqaraǵai aýdanyndaǵy jumys saparynda Ernazar aýylynda asyl tuqymdy jylqy ósirýmen shuǵyldanatyn «Mýkinov» sharýa qojalyǵynyń ǵylymi jetistikterimen tanysty, - dep habarlaidy Dalanews.kz
Sharýa qojalyǵy 2022 jyly «Besqaraǵai» dep atalatyn qazaqy jylqynyń jańa tipin shyǵarǵan bolatyn. Gendik negizine bailanysty Shoiynqara jáne Baitory degen ataý berilgen qylquiryqtylardyń ereksheligi – kez kelgen aýa raiyna tózimdi. Boiy biik, etti ári sútti. Tebindegi aiǵyrlary 700, bieleri 600 kelige deiin tartady. Miniske de, jegiske de shydamdy. Selektsiia jumysyna Almatydaǵy Qazaq ulttyq agrarlyq ýniversiteti men Semeidegi Shákárim ýniversitetiniń ǵalymdary atsalysty. Qazaqy jylqylardy býdandastyrý arqyly jańa tip shyǵarý jumysy 1968 jyly bastalǵan.
Sharýa qojalyǵy byltyr «Ertis» dep atalatyn qazaqy jylqy tuqymynyń jańa zaýyttyq tipin tanystyrdy. Bul – Besqaraǵai aýdanyndaǵy jylqylardyń jańa tipine sátti irikteý júrgizgen ekinshi qadam.
Al qazir sharýashylyqta qazaqtyń aq bas siyrynan Besqaraǵai óńirine beiimdelgen múiizsiz siyrdyń jańa tipin shyǵarý baǵytynda ǵylymi jumys júrgizilýde.
Oblys ákimi sharýashylyqtyń ǵylymi jetistikterin joǵary baǵalap, osy baǵyttaǵy jumysty jalǵastyrýdyń mańyzyn atap ótti.
«Mal tuqymyn asyldandyrý – mańyzdy másele. Besqaraǵai aýdanynda ósirilgen qazaqy jylqy tuqymyn oblystyń barlyq aýdandaryna taratyp, mal sapasyn jaqsartý qajet. Sannan sapaǵa kóshetin kez keldi. Aýyl sharýashylyǵy basqarmasy sharýa qojalyǵyna jan-jaqty qoldaý kórsetińizder»,- dedi aimaq basshysy.
