اباي وبلىسىنىڭ اكىمى بەرىك ءۋالي بەسقاراعاي اۋدانىنداعى جۇمىس ساپارىندا ەرنازار اۋىلىندا اسىل تۇقىمدى جىلقى وسىرۋمەن شۇعىلداناتىن «مۋكينوۆ» شارۋا قوجالىعىنىڭ عىلىمي جەتىستىكتەرىمەن تانىستى، - دەپ حابارلايدى Dalanews.kz

شارۋا قوجالىعى 2022 جىلى «بەسقاراعاي» دەپ اتالاتىن قازاقى جىلقىنىڭ جاڭا ءتيپىن شىعارعان بولاتىن. گەندىك نەگىزىنە بايلانىستى شويىنقارا جانە بايتورى دەگەن اتاۋ بەرىلگەن قىلقۇيرىقتىلاردىڭ ەرەكشەلىگى – كەز كەلگەن اۋا رايىنا ءتوزىمدى. بويى بيىك، ەتتى ءارى ءسۇتتى. تەبىندەگى ايعىرلارى 700، بيەلەرى 600 كەلىگە دەيىن تارتادى. مىنىسكە دە، جەگىسكە دە شىدامدى. سەلەكسيا جۇمىسىنا الماتىداعى قازاق ۇلتتىق اگرارلىق ۋنيۆەرسيتەتى مەن سەمەيدەگى شاكارىم ۋنيۆەرسيتەتىنىڭ عالىمدارى اتسالىستى. قازاقى جىلقىلاردى بۋدانداستىرۋ ارقىلى جاڭا تيپ شىعارۋ جۇمىسى 1968 جىلى باستالعان.

شارۋا قوجالىعى بىلتىر «ەرتىس» دەپ اتالاتىن قازاقى جىلقى تۇقىمىنىڭ جاڭا زاۋىتتىق ءتيپىن تانىستىردى. بۇل – بەسقاراعاي اۋدانىنداعى جىلقىلاردىڭ جاڭا تيپىنە ءساتتى ىرىكتەۋ جۇرگىزگەن ەكىنشى قادام.

ال ءقازىر شارۋاشىلىقتا قازاقتىڭ اق باس سيىرىنان بەسقاراعاي وڭىرىنە بەيىمدەلگەن ءمۇيىزسىز سيىردىڭ جاڭا ءتيپىن شىعارۋ باعىتىندا عىلىمي جۇمىس جۇرگىزىلۋدە.

وبلىس اكىمى شارۋاشىلىقتىڭ عىلىمي جەتىستىكتەرىن جوعارى باعالاپ، وسى باعىتتاعى جۇمىستى جالعاستىرۋدىڭ ماڭىزىن اتاپ ءوتتى.

«مال تۇقىمىن اسىلداندىرۋ – ماڭىزدى ماسەلە. بەسقاراعاي اۋدانىندا وسىرىلگەن قازاقى جىلقى تۇقىمىن وبلىستىڭ بارلىق اۋداندارىنا تاراتىپ، مال ساپاسىن جاقسارتۋ قاجەت. ساننان ساپاعا كوشەتىن كەز كەلدى. اۋىل شارۋاشىلىعى باسقارماسى شارۋا قوجالىعىنا جان-جاقتى قولداۋ كورسەتىڭىزدەر»،- دەدى ايماق باسشىسى.